საქართველოს წიგნის გამომცემელთა და გამავრცელებელთა ასოციაციის ორგანიზებით თბილისის წიგნის XXII საერთაშორისო ფესტივალი 22-27 სექტემბერს გაიმართება. ორგანიზატორთა ინფორმაციით, ფესტივალი ყველა რეგულაციის დაცვით ExpoGeorgia-ში ჩატარდება.
„არსებული ვითარებიდან გამომდინარე, ფესტივალის მიმდინარეობის პერიოდი გახანგრძლივდა და 4 დღის ნაცვლად 6 დღის განმავლობაში უმასპინძლებს დამთვალიერებლებს“, – აღნიშნულია განცხადებაში.
ორგანიზატორთა განცხადებით, წიგნების შეძენა შესაძლებელი იქნება Expo Georgia-ს ეზოშიც, მე-11 პავილიონის მიმდებარე ტერიტორიაზე (პავილიონში შეუსვლელად), სადაც შესაძლებელი იქნება წინასწარ შერჩეული წიგნების გამომცემლობების ოპერატორებთან შეძენა. წიგნების შეძენება ასევე შესაძლებელი იქნება ონლაინ რეჟიმშიც www.gpba.ge-ზე.
Expo Georgia-ს მე-11 პავილიონში სტუმრობის მსურველთათვის უახლოეს დღეებში გამოცხადდება წინასწარი რეგისტრაცია, რადგან პავილიონში ერთდროულად დასაშვები ადამიანების რაოდენობა შეზღუდული იქნება.
ფესტივალში მონაწილეობას 40-ზე მეტი ორგანიზაცია მიიღებს, რომელთაგან თითოეული ტრადიციულად სპეციალურ საფესტივალო ფასდაკლებას შესთავაზებს მკითხველს.
თბილისის წიგნის 22-ე საერთაშორისო ფესტივალის ლიტერატურულ-საგამომცემლო პროგრამისთვის მთავარი სცენა განთავსდება Expo Georgia-ს ეზოში, ღია ცის ქვეშ.
