ჯანდაცვის მსოფლიო ორგანიზაციის ექსპერტთა სტრატეგიული მრჩეველთა ჯგუფი (SAGE) „სინოფარმის“ შესახებ რეკომენდაციებს აქვეყნებს, გადაწყვეტილების მიმღები ორგანოების მიმართ.
გამოქვეყნებული დოკუმენტების თანახმად, ვაქცინის ეფექტიანობა, მრავალ ქვეყანაში წარმოებული მე-3 ფაზის კვლევის შედეგების მიხედვით, 78.1%-ია. რაც შეეხება კონკრეტულ ქვეყანას – მაგალითად, ბაჰრეინში ვაქცინის ეფექტიანობა 18-დან 60 წლამდე ადამიანებს შორის 90%-ია. 60 წელს გადაცილებულ მოქალაქეებს შორის – 91%.
SAGE ამბობს, რომ ვაქცინის უსაფრთხოების კვლევაში 16 671 ადამიანი მონაწილეობდა.
მათ განცხადებაში აღნიშნულია, რომ კვლევის შედეგად:
- არ გამოვლენილა საფრთხის შემცველი გვერდითი მოვლენები;
- არ ყოფილა ანაფილაქსიის არც ერთი შემთხვევა;
- ძირითადი გვერდითი მოვლენები იყო ინექციის გაკეთების ადგილას ტკივილი, თავის ტკივილი და დაღლილობა;
- კვლევის მესამე ფაზაზე ერთი ადამიანი გარდაიცვალა, რომელსაც პლაცებო ჰქონდა მიღებული.
- კვლევის მესამე ფაზაზე ერთ ადამიანს გამოუვლინდა თრომბი;
- გულისრევის 1 და მწვავე დისემინირებული ენცეფალომიელიტის 1 შემთხვევა შეფასებულია, რომ შეიძლება, დაკავშირებული იყოს ვაქცინასთან.
ჯანდაცვის მსოფლიო ორგანიზაციას „სინოფარმის“ ავტორიზაციის შესახებ საბოლოო გადაწყვეტილება ამ ეტაპისთვის ჯერაც არ მიუღია. „სინოფარმით“ აცრა საქართველოში 18 წლიდან მოქალაქეებს შეუძლიათ.
