არასამთავრობო ორგანიზაციები „ქართულ ოცნებას” მოუწოდებენ, გაიაზროს ქვეყნის დემოკრატიული განვითარების პასუხისმგებლობა და პროპორციულ საარჩევნო სისტემაზე დაუყოვნებლივ გადასვლის მიზნით კიდევ ერთხელ მიმართოს პარლამენტს შესაბამისი კონსტიტუციური ცვლილებების ინიციატივით.
განცხადება ოცამდე არასამთავრობო ორგანიზაციამ დღეს ფონდ „ღია საზოგადოება საქართველოს“ ოფისში გააკეთეს.
არასამთავრობო ორგანიზაციების შეფასებით, ბოლო პერიოდის განმავლობაში საქართველოში დემოკრატიული განვითარების მხრივ უკან გადადგმული ნაბიჯები საერთაშორისო ორგანიზაციებისა და საქართველოს მეგობარი ქვეყნების წარმომადგენლებისგან უპრეცედენტო ყურადღების ქვეშ მოექცა.
„დაპირებული პროპორციული საარჩევნო რეფორმის ჩაგდება, უზენაესი სასამართლოს დაკომპლექტების პროცესი, შექმნილი პოლიტიკური კრიზისი და საქართველოს მთავრობის პოლიტიკა ქვეყნის პარტნიორების მხრიდან მწვავე კრიტიკის საგანი გახდა. ამის დასტურია ევროპარლამენტის ტრიბუნიდან გაკეთებული კრიტიკული განცხადებები და საქართველოს პრემიერ-მინისტრის სახელზე ამერიკის შეერთებული შტატების წარმომადგენელთა პალატისა და სენატის წევრების მიერ გამოგზავნილი რამდენიმე მწვავე წერილი”, – ნათქვამია NGO-ების მიმართვაში.
მიმართვის ტექსტის მიხედვით, ამ სიტუაციაში გამოსავალი საზოგადოებისთვის მიცემული პირობის შესრულება და პროპორციულ სააარჩევნო სისტემაზე გადასვლა იქნება.
„ეს ნაბიჯი ქართული და საერთაშორისო საზოგადოების მხრიდან აღიქმება, როგორც მმართველი პარტიის მზაობა, უზრუნველყოს ქვეყნის დემოკრატიული განვითარება. 2020 წლის საპარლამენტო არჩევნების წინ სამართლიანი და თანასწორი საარჩევნო გარემოს შექმნა განამტკიცებს არჩევნების ლეგიტიმურობას, აღადგენს დასავლელი პარტნიორების ნდობას და მნიშვნელოვნად გააუმჯობესებს ქვეყნის რეპუტაციას. საარჩევნო სისტემის ცვლილება პოლიტიკურ პარტიებს შესაძლებლობას მისცემს, წინასაარჩევნო მზადების რეჟიმში გადავიდნენ, შეამცირებს პოლარიზაციის ხარისხს, შექმნის პოლიტიკური პროცესის დასტაბილურების წინაპირობას”, – ნათქვამია NGO – ების განცხადებაში.
მიმართვას ხელს აწერენ: სამართლიანი არჩევნების და დემოკრატიის საერთაშორისო საზოგადოება (ISFED); საერთაშორისო გამჭვირვალობა საქართველო (TI); ღია საზოგადოების ფონდი (OSGF) ; ინფორმაციის თავისუფლების განვითარების ინსტიტუტი (IDFI) საქართველოს დემოკრატიული ინიციატივა (GDI); საქართველოს ახალგაზრდა იურისტთა ასოციაცია (GYLA); სამოქალაქო კულტურის საერთაშორისო ცენტრი (ICCC); ადამიანის უფლებათა ცენტრი (HRIDC); დემოკრატიის კვლევის ინსტიტუტი(DRI); საქართველოს დემოკრატიული განვითარების კავშირი; სტრატეგიული კვლევების რეგიონული ცენტრი; საფარი; ეკონომიკური პოლიტიკის კვლევის ცენტრი (EPRC); საქართველოს რეფორმების ასოციაცია (GRASS); მწვანე ალტერნატივა; ლიბერალური აკადემია თბილისი; საქართველოს მედია-კლუბი; საქართველოს ფერმერთა ასოციაცია (GFA); ადამიანის უფლებათა და სოციალური სამართლიანობის დაცვის ცენტრი; რეგიონულ მაუწყებელთა ალიანსი (AB); ჟურნალისტიკის რესურსცენტრი (JRC); რეგიონის განვითარების ცენტრი.
14 ნოემებრს საქართველოს პარლამენტმა პროპორციულ საარჩევნო სისტემაზე გადასვლაზე საკონსტიტუციო ცვლილებებს მხარი არ დაუჭირა და ჩააგდო. პარლამენტის ამ გადაწყვეტილებას ნოემბერში სამოქალაქო საზოგადოების პროტესტი მოჰყვა. პროტესტის პარალელურად საარჩევნო სისტემაში ცვლილებებზე მოლაპარაკებები დაიწყეს მთავრობისა და ოპოზიციური პარტიების წარმომადგენლებმა. ამ მიზნით გამართული რამდენიმე შეხვედრა უშედეგოდ დასრულდა. „ქართული ოცნება” პროპორციულ საარჩევნო სისტემაზე გადასვლას არ გეგმავს, ოპოზიცია კი 2020 წლის ოქტომბრის არჩევნების შერეული საარჩევნო სისტემით ჩატარების წინააღმდეგია.
