აშშ-ის ელჩი საქართველოში, რობინ დანიგანი „რადიო თავისუფლებასთან” ინტერვიუში „ქართული ოცნების” საპატიო თავმჯდომარის, ბიძინა ივანიშვილის მხრიდან კომუნიკაციის მცდელობებზე, მასთან ურთიერთობასა და ივანიშვილის წინააღმდეგ შემუშავებულ სანქციებზე საუბრობს.
დანიგანის თქმით, ივანიშვილთან შეხვედრის არაერთი მცდელობის მიუხედავად, მათ კომუნიკაცია ვერ დაამყარეს, რადგან „ოცნების” საპატიო თავმჯდომარემ ყველა შეხვედრაზე უარი განაცხადა.
ელჩი ამბობს, რომ ივანიშვილი თავის კერძო ფინანსურ ინტერესებს საქართველოს ხალხის ინტერესებზე მაღლა აყენებს.
„არასდროს შევხვედრივარ ბატონ ივანიშვილს. მე მოვითხოვე მასთან შეხვედრა, ისევე, როგორც სამმა ამერიკელმა მაღალჩინოსანმა, საქართველოში ჩემი ელჩობის პერიოდში და მან უარი განაცხადა ყველა შეხვედრაზე. ვფიქრობ, პრობლემურია, როცა პირი, რომელიც კარგად ცნობილია, რომ მართავს მთავრობასა და მმართველ პარტიას ამ ქვეყანაში, უარს ამბობს შეხვდეს საერთაშორისო მხარეებს, სტრატეგიულ პარტნიორებს, მის მიმართ ფინანსური სანქციების დაკისრებაზე საკუთარი მცდარი აღქმის გამო. ანუ, თავის კერძო ფინანსურ ინტერესებს აყენებს საქართველოს ხალხის ინტერესებზე მაღლა. და მინდა ვთქვა და ხაზი გავუსვა, რომ ჩვენ არ დაგვიწესებია ფინანსური სანქციები ბატონი ივანიშვილისთვის ან მისი ოჯახის წევრებისთვის.
ვიცი, იყო ინფორმაცია, რომ თითქოს ჩვენ ეს გავაკეთეთ, თავად მან [ივანიშვილმა] განაცხადა, რომ მის მიმართ არის დე ფაქტო სანქციები, რაც არ არის სიმართლე. მას აქვს საკუთარ ფულთან დაკავშირებული სასამართლო საქმეები „კრედიტ სუისთან“ და როგორც ჩვენი საელჩოს პოსტში განვაცხადეთ, ის საქმეები განიხილება სასამართლოებში, ბერმუდასა და სინგაპურში და არა აშშ-ის მთავრობასთან. მისი საერთაშორისო ადვოკატები იმის თაობაზე არ დავობენ, რომ ჩვენ მას [ივანიშვილს] დე ფაქტო სანქციები დავუწესეთ. ასე რომ, ეს უბრალოდ არ არის სიმართლე.
არ ვიცი რატომ შეიძლება საკუთარ ფულზე რაღაც აღქმის გამო, ჩვენთან გულწრფელ, პირდაპირ საუბარზე უარს აცხადებდეს პარტიის საპატიო ლიდერი და თავმჯდომარე თუ, მრავალი თვალსაზრისით, ამ მთავრობის ლიდერი – საქართველოს პარტნიორებთან, რომლებსაც 32 წლის განმავლობაში საქართველოსთვის მხარდაჭერის გარდა არაფერი უკეთებიათ”, – აცხადებს დანიგანი.
ელჩის თქმით, ბიძინა ივანიშვილს ჰქონდა კომუნიკაცია საელჩოსთან, რა დროსაც „მკაფიოდ განმარტა, რომ ერთ-ერთი მიზეზი, რატომაც ის ჩვენ არ გვხვდება, არის ის, რომ მისი პირადი ქონება ამ სასამართლო სარჩელებშია დაკავებული”.
