„ქართული ოცნების“ ოფისში საპარლამენტო უმრავლესობის სხდომა გაიმართა. სხდომის დასრულების შემდეგ უმრავლესობის ლიდერმა, ირაკლი კირცხალიამ განაცხადა, რომ „ოცნების” გუნდი შესაბამის უწყებებთან მუშაობს „ადმინისტრაციულ სამართალდარღვევათა კოდექსში“ ცვლილებებზე, რომლებიც საგზაო მოძრაობის წესებს შეეხება.
მისი თქმით, რიგ შემთხვევებში „უნდა შემსუბუქდეს მიდგომები და ჯარიმები იმის მიხედვით, თუ რა დონის კანონდარღვევაა და რამდენად პროპორციულია ამ გადაცდომასთან მოქმედი ჯარიმა“.
კირცხალიას განცხადებით, კონკრეტული ცვლილებების საზოგადოებისთვის წარდგენა საგაზაფხულო სესიის ბოლოსთვის იგეგმება.
„კონსულტაციები მიმდინარეობს სახელმწიფო მინისტრთან, ბატონ მამუკა მდინარაძესთან, ასევე შინაგან საქმეთა სამინისტროსთან, ბატონ სულხან თამაზაშვილთან „ადმინისტრაციულ სამართალდარღვევათა კოდექსში“ რიგი ცვლილებების განხორციელების შესახებ. ცვლილებები შეეხება საგზაო ტრანსპორტის მოძრაობის წესებს.
ჯერჯერობით კონსულტაციების რეჟიმში ვართ და ალბათ უკვე შემდეგი სასესიო კვირისთვის ანუ საგაზაფხულო სესიის ბოლოს რაღაც გარკვეული ცვლილებები გვექნება.
ვფიქრობთ, რომ რიგ შემთხვევაში, საგზაო წესებთან დაკავშირებით, შემსუბუქდეს რიგი მიდგომები და რიგი ჯარიმები, დაბალანსდეს, ასე უფრო სწორი იქნება, იმასთან მიმართებით, თუ რა დონის გადაცდომაა და კანონდარღვევაა და რამდენად პროპორციულია ამ გადაცდომასთან ის დღევანდელი მოქმედი ჯარიმები.
დამერწმუნეთ, კონსენსუსს აუცილებლად მივაღწევთ და ალბათ უკვე მომდევნო კვირებში საზოგადოებას გავაცნობთ, თუ რა ცვლილებები დაიგეგმება და რა კონკრეტულ მიმართულებებს შეეხება ეს ყველაფერი“, – თქვა კირცხალიამ.
2026 წლის 1 მაისიდან ძალაში შევიდა „ადმინისტრაციულ სამართალდარღვევათა კოდექსში“ შეტანილი ცვლილებები, რომლის მიხედვითაც საგზაო-სატრანსპორტო წესების დარღვევისთვის ჯარიმები გაიზარდა.
გაიზარდა სანქციები მათ შორის ისეთ დარღვევებზე, როგორიცაა ღვედის გამოუყენებლობა და სიჩქარის გადაჭარბება.
ცვლილებების მიხედვით, სანქციები გაიზარდა ცალკეულ სამართალდარღვევებზე, კერძოდ:
- 100 ლარამდე გაიზარდა ჯარიმა სატრანსპორტო საშუალების გზაზე მანევრირების წესების დარღვევისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა შემცირდება 20 ქულით;
- 50-დან 100 ლარამდე გაიზარდა სანქცია 15 კმ/სთ-ზე მეტი, მაგრამ არაუმეტეს 40 კმ/სთ-ის სიჩქარის გადაჭარბებისთვის;
- 50 ლარამდე გაიზარდა სანქცია ავტომობილით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა შემცირდება 10 ქულით;
- 50 ლარამდე გაიზარდა სანქცია ავტომობილის მართვის დროს მძღოლის მიერ მობილურით სარგებლობისთვის;
- დგომა-გაჩერების წესების დარღვევისთვის თბილისის მსგავსად, 50 ლარამდე გაიზარდა ჯარიმის ოდენობა ქუთაისში, ბათუმში, მცხეთაში, რუსთავში, გორში, თელავში, ფოთში, ზუგდიდში, ახალციხეში, ოზურგეთსა და საქართველოს კურორტებზე, ასევე M3, N2, N3 ან T კატეგორიის სატრანსპორტო საშუალებებისთვის;
- დრიფტი, რომელსაც მოჰყვა ნივთის ან ადამიანის სხეულის მსუბუქი დაზიანება, 500 ლარიან ჯარიმასთან ერთად გამოიწვევს სატრანსპორტო საშუალების მართვის უფლების შეჩერებას 6 თვის ვადით. განმეორებით საგზაო მოძრაობის წესების დარღვევა, რომელსაც მოჰყვა საავარიო ვითარების შექმნა ან გამოიწვია საცობის შექმნა, გამოიწვევს დაჯარიმებას 300 ლარის ოდენობით და მართვის მოწმობაზე 30 ქულის შემცირებას;
- 500 ლარიანი ჯარიმაა გათვალისწინებული თბილისში საერთო სარგებლობის საავტომობილო გზაზე N2 ან/და N3 კატეგორიის სატრანსპორტო საშუალების მოძრაობისთვის, იმ შემთხვევაში თუ სატვირთო გადაზიდვის დანიშნულების ადგილი თბილისი არ არის.
- ახალ სამართალდარღვევად განისაზღვრა სატრანსპორტო საშუალების ტროტუარზე ან ქვეითთა გადასასვლელზე დგომა-გაჩერება, რაც თბილისში, ქუთაისში, ბათუმში, მცხეთაში, რუსთავში, გორში, თელავში, ფოთში, ზუგდიდში, ახალციხეში, ოზურგეთში, ან/და საქართველოს კურორტებზე გამოიწვევს დაჯარიმებას 100 ლარის ოდენობით, ხოლო სხვა მუნიციპალიტეტებში – 10 ლარით.
- ტროტუარზე სატრანსპორტო საშუალების მოძრაობისთვის დადგინდა ჯარიმა 200 ლარი, აგრეთვე დამრღვევს მართვის მოწმობაზე შეუმცირდება 30 ქულა;
- ცვლილებები ითვალისწინებს ახალ ამკრძალავ ნიშანს − „გაჩერება აკრძალულია სახანძრო ჰიდრანტთან“. აღნიშნული კრძალავს სახანძრო ჰიდრანტთან სატრანსპორტო საშუალების როგორც გაჩერებას, ისე დგომას. დასახელებული მოთხოვნის დაუცველობა გამოიწვევს პირის დაჯარიმებას 200 ლარის ოდენობით, აგრეთვე შესაძლებელი გახდა სატრანსპორტო საშუალების სპეციალურ დაცულ სადგომზე გადაყვანა.
ახლებურად განისაზღვრა BUS LANE-ზე სამარშრუტო სატრანსპორტო საშუალების გარდა სხვა სატრანსპორტო საშუალების მოძრაობის საკითხები, კერძოდ:
- BUS LANE-ზე მოძრაობა, არსებულ 100 ლარიან ჯარიმასთან ერთად, დამატებით გამოიწვევს მართვის მოწმობაზე 15 ქულის შემცირებას, ხოლო ქმედების განმეორებისთვის გათვალისწინებულია ჯარიმა 150 ლარის ოდენობით და მართვის მოწმობაზე 30 ქულის შემცირება;
- საერთო ნაკადის საპირისპირო მიმართულებით მოწყობილ BUS LANE-ზე მოძრაობა, გაჩერება ან დგომა გამოიწვევს დაჯარიმებას 200 ლარის ოდენობით და მართვის მოწმობაზე 20 ქულის შემცირებას, ხოლო ქმედების განმეორებისთვის გათვალისწინებულია ჯარიმა 300 ლარის ოდენობით და მართვის მოწმობაზე 30 ქულის შემცირება.
