ადგილობრივ კომპანიებს, რომლებიც ახალ პროექტებს იწყებენ, სახელმწიფო სესხის 90%-ის გარანტიით მხარში დაუდგება - გახარია

პუბლიკა

იმ კომპანიებს, რომლებიც იწყებენ ახალ პროექტებს, სახელმწიფო მხარში დაუდგება საბანკო სესხის 90 პროცენტის გარანტიით. ხოლო იმ კომპანიებს, რომლებსაც უკვე აღებული აქვთ სესხი, არსებულ პროექტებში, მათ სახელმწიფო გვერდში 30 პროცენტის გარანტიით დაუდგება, – ამის შესახებ საქართველოს პრემიერ-მინისტრმა, გიორგი გახარიამ მთავრობის სხდომაზე განაცხადა.

პრემიერ-მინისტრის თქმით, ეს არის ამ კომპანიების მდგრადობისა და მათთვის ლიკვიდობის შენარჩუნების ყველაზე ეფექტური და სწრაფი შესაძლებლობა.

„დღეს გამოტანილი გვაქვს რამდენიმე საკითხი – პირველ რიგში, ეს ეხება საკრედიტო-საგარანტიო სქემის მექანიზმის შეცვლას, საკანონმდებლო ცვლილებას. ეს გახლავთ ერთ-ერთი ღონისძიება, რომლითაც ჩვენ ვეხმარებით ადგილობრივ კომპანიებს. აქ ძირითადი შინაარსობრივი კომპონენტი ის გახლავთ, რომ იმ კომპანიებს, რომლებიც იწყებენ ახალ პროექტებს, სახელმწიფო მხარში დაუდგება საბანკო სესხის 90 პროცენტის გარანტიით, ხოლო იმ კომპანიებს, რომლებსაც უკვე აღებული აქვთ სესხი, არსებულ პროექტებში, მათ სახელმწიფო გვერდში დაუდგება 30 პროცენტის გარანტიით.ეს არის ამ კომპანიების მდგრადობისა და მათთვის ლიკვიდობის დატოვების ყველაზე ეფექტური და სწრაფი შესაძლებლობა“, – განაცხადა გიორგი გახარიამ.