არასამთავრობო ორგანიზაციების ქსელი: დაიწყოს ზვიად ხარაზიშვილის მიმართ სისხლის სამართლებრივი დევნა

პუბლიკა

არასამთავრობო ორგანიზაციების ქსელი გენერალურ პროკურატურასა და სპეციალურ საგამოძიებო სამსახურს 2 თებერვალს, „თბილისი მოლთან“ განვითარებული მოვლენების შესახებ მოუწოდებს: „აწარმოონ დროული და ეფექტიანი გამოძიება სათანადო კვალიფიკაციით და დაუყოვნებლივ დაიწყოს შესაბამისი სამართალდამცველების, მათ შორის, ზვიად ხარაზიშვილის (ხარებას) მიმართ სისხლის სამართლებრივი დევნა“.

არასამთავრობო ორგანიზაციების სამართლებრივი დახმარების ქსელის თქმით, მათ ცხელ ხაზზე 26 პირის დაკავებაზე შევიდა შეტყობინება.  ორგანიზაციების განცხადებით, დაკავებულები საუბრობენ პოლიციელთა მხრიდან მათ მიმართ დაკავებისას და დაკავების შემდგომ ფიზიკურ ძალადობაზე. 5 პირი მოთავსდა სამედიცინო დაწესებულებაში.

„არასამთავრობო ორგანიზაციების სამართლებრივი დახმარების ქსელის იურისტები განაგრძობენ მშვიდობიანი დემონსტრანტების უფლებების დაცვას. გასული ღამის განმავლობაში ქსელის ცხელ ხაზზე 26 პირის დაკავებაზე მივიღეთ შეტყობინება.  დაკავებულთა მონახულება დაკავებიდან რამდენიმე საათის შემდეგ შეძლეს ადვოკატებმა. დაკავებულები საუბრობენ პოლიციელთა მხრიდან მათ მიმართ დაკავებისას და დაკავების შემდგომ ფიზიკურ ძალადობაზე. დაზიანებების სიმძიმის გათვალისწინებით, ქსელის ინფორმაციით, 5 პირი მოთავსდა სამედიცინო დაწესებულებაში“.

ორგანიზაციები აღნიშნავენ, რომ საპოლიციო ძალები ცდილობდნენ დემონსტრანტებისთვის შეკრების უფლების გამოყენებაში ხელის შეშლას და თვითნებურად აკავებდნენ და ფიზიკურად უსწორდებოდნენ მათ. დაშავებულთა შორისაა ჟურნალისტი ნიკო კოკაია, რომელიც პროფესიული საქმიანობის შესრულებისას დაშავდა და მისი კლინიკაში გადაყვანა გახდა საჭირო.

„აღსანიშნავია, რომ საპოლიციო ძალები მთელი საღამოს განმავლობაში ცდილობდნენ ხელი შეეშალათ მშვიდობიანი დემონსტრანტებისთვის შეკრების უფლების განხორციელებაში. ისინი თვითნებურად აკავებდნენ და ფიზიკურად უსწორდებოდნენ მათ, ამასთან, რამდენიმე ეპიზოდში ადგილი ჰქონდა აქციის მონაწილეთა ისეთ შევიწროებას, რაც ჭყლეტის და ჯანმრთელობის დაზიანების საფრთხეს ქმნიდა.

ფიზიკურ ანგარიშსწორებასთან ერთად, ცალკეული სამართალდამცავები სიტყვიერ შეურაცხყოფას აყენებდნენ დემონსტრანტებს, განსაკუთრებით კი, ქალებს. დაკავებულთა ნაწილი საუბრობს დაკავების შემდგომ, ავტომობილებში პოლიციელების მხრიდან ძალადობაზე. დაშავებულთა შორის არის ჟურნალისტი, ნიკო კოკაია. იგი პროფესიული საქმიანობის შესრულებისას დაშავდა და კლინიკაში გადაყვანა გახდა საჭირო“.

არასამთავრობო ორგანიზაციების ქსელის განცხადებით, საჯაროდ გავრცელებული კადრებში ჩანს, რომ შსს მშვიდობიანი დემონსტრანტების მიმართ იყენებდა არასათანადო მოპყრობის პრაქტიკას და დაკავებულ პირზე ძალადობაში უშუალოდ მონაწილეობდა გდდ-ს ხელმძღვანელი ზვიად ხარაზიშვილი (ხარება).

„საჯაროდ გავრცელებული კადრები მოწმობს, რომ შსს მშვიდობიანი დემონსტრანტების მიმართ კვლავ აგრძელებს არასათანადო მოპყრობის პრაქტიკას. ტვ პირველის მიერ გავრცელებული კადრები ადასტურებს, რომ დაკავებულ პირზე ძალადობაში უშუალოდ მონაწილეობს გდდ-ს ხელმძღვანელი ზვიად ხარაზიშვილი, რომელთანაც დაკავებული პირი სამართალდამცავებს მიჰყავთ ფიზიკური ანგარიშსწორებისთვის. ასევე, გავრცელდა კადრები, თუ როგორ მიუთითებს აღნიშნული პირი საპოლიციო ძალებს კამერების წინ მოერიდონ დემონსტრანტებზე ძალადობას.

დაკავებულთა შორის იყო არასრულწლოვანიც, რომლის ადგილსამყოფელიც რამდენიმე საათიანი ძებნის შემდეგ, დადგინდა, რომ ის იმყოფებოდა შინაგან საქმეთა სამინისტროს კახეთის გზატკეცილზე მდებარე ადმინისტრაციულ შენობაში. ადვოკატს არ მიეცა არასრულწლოვან დაკავებულთან კომუნიკაციის შესაძლებლობა და მხოლოდ მისი დაჟინებული მოთხოვნით, ხელწერილის საფუძველზე გათავისუფლების შემდეგ თავად გამოიყვანეს იგი შენობიდან. დაკავებული ადვოკატთან საუბრისას აღნიშნავს, რომ არის ნაცემი და მას დაკავების შემდეგ ამოაცალეს ტელეფონი და საფულე“.

არასამთავრობო ორგანიზაციების ქსელის განცხადებით, დაკავებულთა უმეტესობა ამ დრომდე დროებითი მოთავსების იზოლატორებში იმყოფება და ამ დროისთვის, ადვოკატებისთვის არაა ცნობილი, დაკავებულები 24 საათის გასვლისთანავე დატოვებენ იზოლატორებს, თუ შსს „კვლავ განაგრძობს სრულიად უსაფუძვლოდ, მაქსიმალური, 48 საათიანი ვადის გამოყენების მავნე პრაქტიკას“.

 

განცხადებაზე ხელს აწერენ:

  • საქართველოს ახალგაზრდა იურისტთა ასოციაცია
  • სამოქალაქო საზოგადოების ფონდი
  • საერთაშორისო გამჭვირვალობა – საქართველო
  • ქალთა ინიციატივების მხარდამჭერი ჯგუფი
  • უფლებები საქართველო
  • დემოკრატიის კვლევის ინსტიტუტი
  • საქართველოს დემოკრატიული ინიციატივა
  • უფლებადამცველთა გაერთიანება – ადამიანის უფლებათა ცენტრი
  • სამართლიანი არჩევნებისა და დემოკრატიის საერთაშორისო საზოგადოება
  • პარტნიორობა ადამიანის უფლებებისთვის
  • სოციალური სამართლიანობის ცენტრი
  • ტოლერანტობის და მრავალფეროვნების ინსტიტუტი
  • ინფორმაციის თავისუფლების განვითარების ინსტიტუტი