პარლამენტში იურიდიულ საკითხთა კომიტეტის სხდომაზე შინაგან საქმეთა მინისტრობის კანდიდატს, ვახტანგ გომელაურს უსმენენ. ვახტანგ გომელაურმა თავის მოხსენებაში კიდევ ერთხელ ისაუბრა დანაშაულების სტატისტიკაზე და აღნიშნა, რომ დანაშაულები შემცირებულია 10%-ით.
„მიუხედავად იმისა, რომ პანდემიამ, ფაქტობრივად, გააორმაგა პოლიციის პასუხისმგებლობა, მნიშვნელოვანი პროგრესი გვაქვს, ჩვენი, ძირითადი საქმიანობის კუთხით. უმთავრესი გახლავთ, რა თქმა უნდა, კრიმინალთან ბრძოლა. დანაშაული გასულ წელთან შედარებით შემცირდა 10%-ით. კლების მნიშვნელოვანი ტენდენცია გვაქვს მთელ რიგ დანაშაულებზე – ყაჩაღობა შემცირდა 42%-ით, გამოძალვა შემცირდა 34%-ით, ძარცვა – 25%-ით, ქურდობა – 12%-ით, ხოლო ბინების გაქურდვა შემცირდა 28%-ით; მკვლელობის მცდელობა – 5%-ით.
ცხადია, არავინ გაურბის იმ ფაქტებს, რომ გვაქვს მატება გარკვეულ დანაშაულებებზე – კიბერდანაშაულმა მოიმატა 24%-ით, ოჯახში ძალადობამ მოიმატა 8.5%-ით, ხოლო მკვლელობამ – 11%-ით, რაც 7 ერთეულით მეტია გასულ წელთან შედარებით“, – განაცხადა ვახტანგ გომელაურმა.
