საპარლამენტო ფრაქცია „საქართველოსთვის“ დიუშენით დაავადებული ბავშვების საკითხზე ჯანდაცვის მინისტრს მიხეილ სარჯველაძეს პარლამენტში იბარებს. ამის შესახებ ჯანდაცვის კომიტეტის წევრმა ქეთევან ბაკარაძემ განაცხადა.
„ჯანდაცვის მინისტრმა სარჯველაძემ, რომელიც თვეების განმავლობაში ვერ ბედავდა სასოწარკვეთილ მშობლებთან პირისპირ შეხვედრას და თვალებში ჩახედვას, რამდენიმე წუთის წინ ბრიფინგით, ფაქტობრივად, უარი განაცხადა დიუშენის კუნთოვანი დისტროფიის დიაგნოზის მქონე ბავშვებისთვის სასიცოცხლო პრეპარატის დაფინანსებაზე.
ქვეყნის ჯანდაცვის პოლიტიკის განმსაზღვრელმა პირმა 31 ბავშვი, ფაქტობრივად, გაწირა ტრაგედიისთვის; ბავშვები, რომლებიც სწორედ მისგან ელოდნენ მათი ცხოვრების ხარისხის გაუმჯობესებისა და სიცოცხლის გახანგრძლივების ერთადერთ შესაძლებლობას. მშობლებისთვის და ფართო საზოგადოებისთვის სრულიად მიუღებელია ის არგუმენტები, რომლებზეც აპელირებდა ბატონი სარჯველაძე.
აქედან გამომდინარე, ჩვენმა პოლიტიკურმა გუნდმა მიიღო გადაწყვეტილება, სასწრაფო წესით ინტერპელაციაზე პარლამენტში დავიბაროთ ჯანდაცვის მინისტრი, სადაც მას მოუწევს კითხვებზე პასუხის გაცემა, რას აკეთებს ჯანდაცვის სამინისტრო და ხელისუფლება, როცა ეს ადამიანებს ყველაზე მეტად სჭირდებათ“, – განაცხადა მან.
მიხეილ სარჯველაძემ დიუშენის კუნთოვანი დისტროფიის მქონე ბავშვებისა და მათი მშობლების საპროტესტო აქციის საპასუხოდ ბრიფინგი გამართა და თქვა, რომ წამლები, რომლებზე წვდომასაც ისინი მოითხოვენ, ჯანმრთელობისთვის სახიფათოა, ხოლო მათი ფუნქცია არ არის სიცოცხლის გახანგრძლივება.
„მოთხოვნა წამოყენებულია წამლებზე, რომელთა ფუნქციაც არის არა სიცოცხლის გადარჩენა, არა განკურნება, არც სიცოცხლის გახანგრძლივება. ამ მედიკამენტების ფუნქცია არის მხოლოდ ის, რომ (და აქაც კითხვის ნიშნება), რომ გადაავადოს ეტლის საჭიროება“, – თქვა მიხეილ სარჯველაძემ.
მისივე თქმით, „დიუშენის განკურნებაზე პრეტენზიის მქონე მედიკამენტი დღეს მსოფლიოში არ არსებობს“.
„არსებობს მხოლოდ მედიკამენტები, რომლებსაც აქვთ პრეტენზია დაავადების მიმდინარეობის ისეთ შენელებაზე, როცა ეტლის გამოყენების საჭიროება შეიძლება გადავადდეს ერთიდან სამ წლამდე. აქვე იმედს გამოვთქვამ და მთელი გულით ვგულშემატკივრობ, რომ ახლო მომავალში ასეთი მედიკამენტი შეიქმნება, რაც უზრუნველყოფს ყველას ჯანმრთელობას”, – განაცხადა სარჯველაძემ.
მთავრობის ადმინისტრაციასთან დიუშენით დაავადებული ბავშვების მშობლებმა 24-საათიანი საპროტესტო აქცია გუშინ, 20 აპრილს დაიწყეს.
დიუშენის კუნთოვანი დისტროფიით დაავადებული ბავშვების მშობლები მოითხოვენ, სახელმწიფომ შეიძინოს და დააფინანსოს თანამედროვე მედიკამენტები, რომლებიც სხვა ქვეყნებში უკვე გამოიყენება და ბავშვების მდგომარეობის გაუარესებას ანელებს.
მშობლები ასევე 2 თვეზე მეტია, უშედეგოდ ცდილობენ ირაკლი კობახიძესთან შეხვედრას.
