მუხთარლი ამბობს, რომ პროკურატურაში აზერბაიჯანულის მცოდნე თარჯიმანი არ დაახვედრეს

პუბლიკა

აზერბაიჯანელი ჟურნალისტი, აფგან მუხთარლი, რომელიც საქართველოს გენერალურ პროკურატურაში გამოკითხვაზე მივიდა, აცხადებს, რომ თურქული ენის თარჯიმანი დაახვედრეს, რის გამოც პროცესი ვერ შედგა. მუხთარლის თქმით, არც მეორე თარჯიმანმა იცოდა აზერბაიჯანული, რის გამოც გამოკითხვა, სავარაუდოდ, ხვალისთვის გადაიდო.

„არავითარი კითხვები არ ყოფილა. არ იყო თარჯიმანი, აზერბაიჯანულიდან ქართულად რომ ეთარგმნა, ამიტომ შეკითხვები არ დაუსვამთ. ჯერ იყო თარჯიმანი თურქულიდან.- მასზე უარი ვთქვი. საათ-ნახევარში მეორე თარჯიმანი მოვიდა. ვისაუბრეთ, აღმოჩნდა, რომ აზერბაიჯანული არც მან იცოდა. 4 საათი უბრალოდ ვიჯექი. თქვეს, რომ ხვალ სხვა თარჯიმანს იპოვიან. კანონი მოითხოვს, რომ იყოს თარჯიმანი. ვფიქრობ, საქართველოში აზერბაიჯანულიდან ქართულად ბევრი მთარგმნელი უნდა იყოს“, – განაცხადა მუხთარლიმ [ფორმულას თარგმანი].

აფგან მუხთარლის ადვოკატის, არჩილ ჩოფიკაშვილის თქმით, გამოძიება აპირებს, ჩაატაროს საგამოძიებო ექსპერიმენტი, მუხთარლი კი მზადაა, ითანამშრომლოს გამოძიებასთან და მიიღოს ყველა მოქმედებაში მონაწილეობა.

აფგან მუხთარლის მიერ მოწოდებულ ინფორმაციის დასაზუსტებლად „პუბლიკა“ პროკურატურას დაუკავშირდა. პასუხს მიღებისთანავე შემოგთავაზებთ.


აზერბაიჯანელი ჟურნალისტი, აფგან მუხთარლი 2017 წლის 29 მაისს, საღამოს, თბილისის ცენტრიდან გაიტაცეს და ლაგოდეხის სასაზღვრო-გამშვები პუნქტის გავლით აზერბაიჯანულ მხარეს გადასცეს. აზერბაიჯანში მას ბრალად წაუყენეს საზღვრის უკანონო კვეთა და კონტრაბანდა.

აფგან მუხთარლი ამბობდა, რომ ის პოლიტპატიმარია და აზერბაიჯანის მთავრობა, როგორც ჟურნალისტს, დევნიდა. ის ასევე ამბობდა, რომ მისი გატაცების საქმეში მონაწილეობდა როგორც აზერბაიჯანის, ისე საქართველოს ხელისუფლება.

ჟურნალისტის მხარდამჭერი აქციები თბილისში მთავრობის კანცელარიასთან იმართებოდა. აზერბაიჯანში მას 6 წლით თავისუფლების აღკვეთა მიუსაჯეს.  ჟურნალისტი სამწლიანი პატიმრობის შემდეგ 2020 წლის 17 მარტს გათავისუფლდა, რის შემდეგაც გერმანიაში გაემგზავრა, სადაც მისი ოჯახი ცხოვრობდა.