ოპოზიციის ალიანსი ეხმაურება დიუშენის კუნთოვანი დისტროფიის მქონე ბავშვების და მათი მშობლების მოთხოვნას, მიიღონ წამალი, რასაც სახელმწიფო ჯერჯერობით უარით პასუხობს.
ალიანსი აცხადებს, რომ ამ მოვლენებმა წარმოაჩინა, „რამდენად მოშლილი და დეჰუმანიზებულია სახელმწიფო ინსტიტუცია, რომლის უმთავრეს მოვალეობას ჯანმრთელობასა და სიცოცხლეზე ზრუნვა, მით უმეტეს ბავშვთა სიცოცხლეზე ზრუნვა უნდა წარმოადგენდეს“.
ოპოზიციის ალიანსის წევრებმა, თამარ ჩერგოლეიშვილმა, გიგი წერეთელმა და ანი ქავთარაძემ ბრიფინგი გამართეს და დიუშენის კუნთოვანი დისტროფიის ირგვლივ განვითარებულ მოვლენებზე, სისტემურ პრობლემებსა და გამოსავლის გზაზე ისაუბრეს.
„კოალიცია ცვლილებისთვის“ წევრმა, ექიმმა ანა ქავთარაძემ თქვა, რომ ალიანსს აქვს ხედვა იმ პრობლემების გადასაჭრელად, რომელთა მოგვარებაც „ქართული ოცნების პირობებში შეუძლებელია.”
„ბავშვთა ჯანმრთელობა არის ფუნდამენტური უფლება, ეს არ არის პრივილეგია, რომელიც საქართველოში ყოველდღიურად ირღვევა, რისი ნათელი მაგალითიცაა ჯანდაცვის სერვისების ორგანიზებულობის, მედიკამენტებზე ხელმისაწვდომობისა და მძიმე დაავადებების მართვის საკითხი, რომლის განვითარების პირობაც „ქართულმა ოცნებამ“ არაერთხელ დადო, მაგრამ დღეს ჩვენ ვხედავთ რომ არაერთი ბავშვი, ოჯახებთან ერთად სწორედ სიცოცხლის გადასარჩენად სხვა ქვეყნებში გადადის.
ამ მაგალითზე, ძალიან ნათლად ჩანს, რომ ქვეყნის დასავლეთისგან იზოლაცია, უდრის ჩვენი ბავშვებისთვის დასავლურ მედიცინაზე და მედიკამენტებზე წვდომის შეზღუდვას. რადგან არა იმისთვის, რომ არა მხოლოდ იშვიათი, არამედ ზოგადად სხვა დიაგნოზების მქონე ბავშვების ჯანმრთელობის პრობლემები სისტემურად გადაწყდეს, საჭიროა საერთაშორისო პარტნიორობა“, – თქვა ანა ქავთარაძემ.
„ფედერალისტების“ ლიდერმა თამარ ჩერგოლეიშვილმა ხაზი გაუსვა, რომ ავტორიტარულ რეჟიმებს, მათ შორის ბიძინა ივანიშვილის ავტორიტარულ რეჟიმს „ახასიათებს ყველაზე მოწყვლადების, უმწეოების ჩაგვრა”.
მისივე განცხადებით, რეჟიმის შეცვლის გარეშე შეუძლებელია, იშვიათი დაავადების მქონე ბავშვებმა „შველა იპოვონ“.
„დიუშენი უბრალოდ ნათელი მაგალითია იმის, თუ რამდენად ჩაგრავს რეჟიმი ბავშვებს, მაგრამ არსებობს სხვა შემთხვევებიც.
გამოქვეყნდა სახალხო დამცველის ანგარიში, რომლის მიხედვითაც, 2025 წელს 170 ბავშვი გახდა პედოფილიის მსხვერპლი. საქართველოში მძვინვარებს სისტემური პედოფილია, 170 შემთხვევა არის აისბერგის წვერი იმიტომ, რომ ზოგადად პედოფილური დანაშაული იმალება.
საქმე იმაშია, რომ ხელისუფლება და რეჟიმი, ნაცვლად იმისა, რომ რეალურ პრობლემებს დასდევდეს, დაკავებულია მშვიდობიანი დემონსტრანტების დაჭერით ტროტუარზე, მაშინ როცა 12 წლის ბავშვის გამაუპატიურებელმა, შესაძლოა, საპროცესო შეთანხმებით დატოვოს საპატიმრო ისე, რომ ძალიან ცოტა დრო გაატაროს შიგნით.
რეალურად, ეს არის ავტოკრატიის პრობლემა, სისტემური ცვლილების გარეშე ამას ვერ მოევლება. ამის დასტურია განათლების სისტემა, სადაც ჩვენ გვყავს მასწავლებლები, რომლებიც თვითონ არიან წნეხის ქვეშ და თავიანთ საგანში კვალიფიკაცია კი არ მოეთხოვებათ, არამედ რეჟიმის ტროლობა მოეთხოვებათ.
ამის შედეგად ვიღებთ იმას, რომ 500 000 ბავშვზე მეტი იღებს უხარისხო განათლებას საჯარო სკოლებში, ამის შედეგად, ვიღებთ გაზრდილ კრიმინალს, იმიტომ რომ ეს ბავშვები თვითდამკვიდრებას ტრადიციულ კრიმინალურ სტრუქტურებში, ან ნეონაცისტურ დაჯგუფებებში ეძებენ და ვერც იშვიათი დაავადებების, ვერც პედოფილიის და ვერც ბავშვთა დანაშაულის პრობლემა ვერ მოგვარდება ამ რეჟიმის პირობებში.” – განაცხადა თამარ ჩერგოლეიშვილმა.
„ევროპული საქართველოს“ ლიდერმა, გიგი წერეთელმა თქვა, რომ ქვეყანაში ერთ-ერთი მთავარი და ფუნდამენტური პრობლემა სიღარიბეა, საბოლოო ჯამში კი ყველა პრობლემა ერთმანეთთან არის კავშირში.
„სიღარიბის მაჩვენებლები კვლავ არის ძალიან მაღალი – 390 000-ზე მეტი ბავშვი არის რეგისტრირებული სოციალურად დაცვის ბაზაში და აქედან 270 000 იღებს შემწეობას. ეს რიცხვები ნიშნავს, რომ ეს ბავშვები პრაქტიკულად სიღარიბეში ცხოვრობენ. არის მრავალგანზომილებიანი სიღარიბე, არის აბსოლუტური სიღარიბეც და ჩვენ ვხედავთ, რა რთულ მდგომარეობაში არიან ოჯახები.
სიღარიბე არის ავადობის საფუძველი, განსაკუთრებით ბავშვებში და ჩვენ გვაქვს ამის ოფიციალური სტატისტიკა, 500 000-ზე მეტმა ადამიანმა დატოვა 3 წლის განმავლობაში საქართველო, აქედან დაახლოებით 20% ბავშვია.
დემოგრაფიულად ყველაზე მძიმე ვითარებაა ბოლო ათწლეულის განმავლობაში, როცა დაიბადა დაახლოებით, 38 000 ბავშვი და 10-12 წლის წინ, ეს 60 000-მდე იყო“, – თქვა გიგი წერეთელმა.
მისი განცხადებით, პრობლემების მოგვარების გზა ცვლილებებია.
მან მოქალაქეებს 26 მაისს დაგეგმილ შეკრებაში მონაწილეობისკენაც მოუწოდა.
„ამ სისტემის ხელმძღვანელებმა კარგად გაიგონ ხალხის ხმა, რა უნდა ხალხს და რომ მხოლოდ დემოკრატიული ხელისუფლება შეძლებს ამ პრობლემების მოგვარებას და ალიანსს აქვს ძალიან სწორი ხედვა ამასთან დაკავშირებით“, – თქვა გიგი წერეთელმა.
დიუშენის კუნთოვანი დისტროფიით დაავადებული ბავშვების მშობლები მოითხოვენ, სახელმწიფომ შეიძინოს და დააფინანსოს თანამედროვე მედიკამენტები, რომლებიც სხვა ქვეყნებში უკვე გამოიყენება და ბავშვების მდგომარეობის გაუარესებას ანელებს.
დიუშენის კუნთოვანი დისტროფია (DMD) იშვიათი გენეტიკური დაავადებაა. ის ადრეულ ასაკში იწვევს კუნთების განლევას, ეტლზე მიჯაჭვულობასა და ფატალურ შედეგს. საინიციატივო ჯგუფის ცნობით, საქართველოში 100-მდე ბავშვია ამ დიაგნოზით რეგისტრირებული.
„ქართული ოცნების“ მაღალჩინოსნები ამბობენ, რომ დიუშენის კუნთოვანი დისტროფიის წამლების კვლევა დასრულებული არ არის და მათი გამოყენება სარისკოა. ჯანდაცვის მინისტრმა მიხეილ სარჯველაძემ თქვა, რომ წამლები უბრალოდ გადაავადებენ ბავშვების ეტლის გამოყენების საჭიროებას. იმავე ნარატივებს ავრცელებს სამთავრობო პროპაგანდა.
დიუშენის კუნთოვანი დისტროფიის მქონე ბავშვების მშობლები მთავრობის ადმინისტრაციასთან უწყვეტ აქციას მართავენ. შენობასთან მათ უკვე მეოთხე ღამე გააკეთეს.
