ავტორი: ელიზავეტა ჩუხაროვა
ყარაჩაი-ჩერქეზეთის სასამართლომ ჩერქეზთა კონგრესის ლიდერ კასე კიკს, რომელიც ემიგრაციაშია, რუსეთის არმიის შესახებ „ცრუ ინფორმაციის“ გავრცელების ბრალდებით დაუსწრებლად მიუსაჯა შვიდი წლით თავისუფლების აღკვეთა.
ჩერქეზთა კონგრესი საზოგადოებრივ-პოლიტიკური მოძრაობაა, რომელიც აერთიანებს ჩერქეზული დიასპორის წარმომადგენლებს და მიზნად ისახავს ჩერქეზი ხალხის უფლებების დაცვას, ეროვნული იდენტობისა და ისტორიული მეხსიერების შენარჩუნებას.
ბოლო წლებში, განსაკუთრებით რუსეთის მიერ უკრაინაში სრულმასშტაბიანი შეჭრის შემდეგ ჩერქეზთა კონგრესი არაერთხელ გამოვიდა ომის საწინააღმდეგო განცხადებებით და გააკრიტიკა რუსეთის ხელისუფლება. ამის გამო მოძრაობის ლიდერები და აქტივისტები რუსეთის ხელისუფლების განსაკუთრებული ყურადღების ქვეშ მოექცნენ.
ყარაჩაი-ჩერქეზეთის სასამართლოს ცნობით, კიკი დამნაშავედ ცნეს იმ მუხლით, რომელიც რუსეთის შეიარაღებული ძალების შესახებ წინასწარი განზრახვით მცდარი ინფორმაციის საჯაროდ გავრცელებას პოლიტიკური სიძულვილით მოტივირებულ ქმედებად და სისხლის სამართლის დანაშაულად მიიჩნევს.
პროკურატურის მტკიცებით, 2025 წლის იანვარში მან გამოაქვეყნა ვიდეო, რომელიც, მათი შეფასებით, უკრაინაში რუსი სამხედროების მოქმედებების შესახებ „შეგნებულად ცრუ“ განცხადებებს შეიცავდა.
შვიდწლიანი პატიმრობის გარდა, სასამართლომ კიკს სასჯელის მოხდის დასრულების შემდეგ ოთხი წლით აუკრძალა ონლაინრესურსების ადმინისტრირება. კასე კიკის საქმეში ეს ნიშნავს, რომ შვიდწლიანი პატიმრობის დასრულების შემდეგ (თუკი განაჩენი ოდესმე აღსრულდება), მას დამატებით ოთხი წლის განმავლობაში აეკრძალება ნებისმიერი ონლაინრესურსის ადმინისტრირება.
განაჩენი სასამართლომ დაუსწრებლად გამოაცხადა, რადგან კიკი რუსეთის ფარგლებს გარეთ არის.
თავად კიკმა განაჩენი „პოლიტიკურად მოტივირებულად“ შეაფასა.
„ჩემ მიმართ გამოტანილ განაჩენს ვაფასებ, როგორც პოლიტიკურად მოტივირებულ გადაწყვეტილებას, რომელიც დაკავშირებულია ჩემს საჯარო საქმიანობასთან, რუსეთის უკრაინის წინააღმდეგ ომის მიმართ ჩემს თანმიმდევრულ კრიტიკასთან და ჩერქეზი ხალხის უფლებების დაცვის მიმართულებით მრავალწლიან საქმიანობასთან“, – განუცხადა კიკმა OC Media-ს.
მისი თქმით, იგი მუდმივად ეწინააღმდეგებოდა რუსეთის სრულმასშტაბიან შეჭრას უკრაინაში და მხარს უჭერს უკრაინის დამოუკიდებლობას, სუვერენიტეტსა და ტერიტორიულ მთლიანობას. ამავდროულად, მან საკუთარი თავი დაახასიათა, როგორც ჩერქეზი პოლიტიკური მოღვაწე, რომელიც განაგრძობს ჩერქეზი ხალხის უფლებების დაცვას, ჩერქეზეთზე საერთაშორისო ყურადღების მიპყრობას, ჩერქეზების ისტორიულ სამშობლოში დაბრუნების ხელშეწყობასა და ჩერქეზეთის მომავალთან დაკავშირებით საკუთარი პოლიტიკური შეხედულებების წინ წაწევას ექსკლუზიურად მშვიდობიანი, პოლიტიკური და სამართლებრივი საშუალებებით.
„არასდროს ჩამიდენია ძალადობრივი ქმედება და ყოველთვის ღიად გამოვხატავდი ჩემს შეხედულებებს. მსგავსი სასამართლო გადაწყვეტილებები ვერც ჩემს რწმენას შეცვლის და ვერც მაიძულებს, უარი ვთქვა ჩემს საზოგადოებრივ საქმიანობაზე“, – განაცხადა კიკმა, – „იმედი მაქვს, რომ საერთაშორისო უფლებადამცველი ორგანიზაციები, დემოკრატიული სახელმწიფოები და დამოუკიდებელი მედია კვლავაც ყურადღებით დააკვირდებიან მსგავს საქმეებს და მათ ობიექტურ სამართლებრივ და საზოგადოებრივ შეფასებას მისცემენ.“
„ისტორიამ არაერთხელ აჩვენა, რომ პოლიტიკურად მოტივირებულ დევნას არ შეუძლია, გააჩუმოს ისინი, ვინც საკუთარი შეხედულებების დაცვას ერთგულად აგრძელებს. სწორედ ამიტომ, ყველა სახის ზეწოლის მიუხედავად, ვაპირებ ჩემი საქმიანობის გაგრძელებას და სიტყვის თავისუფლების, ადამიანის უფლებებისა და მშვიდობიანი პოლიტიკური საქმიანობის პრინციპების ერთგულებას“, – განაცხადა კიკმა.
ჩერქეზთა კონგრესი აერთიანებს ჩერქეზული დიასპორის წარმომადგენლებს და საქმიანობს ჩერქეზული იდენტობისა და ისტორიული მეხსიერების შენარჩუნების, ასევე ჩერქეზთა უფლებების დაცვის მიმართულებით. რუსეთის მიერ უკრაინაში სრულმასშტაბიანი შეჭრის დაწყების შემდეგ მოძრაობამ არაერთხელ გაავრცელა განცხადებები, რომლებითაც დაგმო ომი და გააკრიტიკა რუსეთის ხელისუფლება.
კიკმა რუსეთი 2022 წლის მაისში დატოვა მას შემდეგ, რაც, მისი განცხადებით, აწამეს ექსტრემიზმთან ბრძოლის ცენტრისა (ცენტრი „ე“) და რუსეთის ფედერალური უსაფრთხოების სამსახურის (ФСБ) თანამშრომლებმა. გავრცელებული ინფორმაციით, ის მას შემდეგ დააკავეს, რაც ერთ-ერთ კაფეში უკრაინული სიმღერის ჩართვა მოითხოვა. პოლიციის განყოფილებაში ცემის დროს სამართალდამცავები მას კიევთან სავარაუდო კავშირებზე ეკითხებოდნენ და „ზელენსკის აგენტსა“ და „უკრაინელ ფაშისტს“ უწოდებდნენ.
რუსეთის არმიის შესახებ „ცრუ ინფორმაციის“ გავრცელება სისხლის სამართლის დანაშაულად 2022 წლის დასაწყისში, უკრაინაში რუსეთის შეჭრიდან მალევე გამოცხადდა.
ადამიანის უფლებათა დამცველმა ორგანიზაციებმა და საერთაშორისო უფლებადამცველმა ინსტიტუტებმა არაერთხელ გააკრიტიკეს ამ მუხლის გამოყენება. მათი შეფასებით, ის ჟურნალისტების, აქტივისტების, პოლიტიკოსებისა და ომის სხვა საჯარო კრიტიკოსების სისხლისსამართლებრივი დევნისთვის გამოიყენება.
სტატია მომზადებულია OC Media-სთან პარტნიორული შეთანხმების ფარგლებში. შესაძლოა, მცირედ რედაქტირებული იყოს სტილისტური თვალსაზრისით. სტატიის ორიგინალი ვერსია შეგიძლიათ წაიკითხოთ აქ.
