ზუგდიდის მერი, გიორგი შენგელია, თანამდებობიდან გადადგა. ამის შესახებ მან სოციალური ქსელით გაავრცელა განცხადება და ზუგდიდელებს მიმართა.
„ორი წელია თქვენთან ერთად ვშრომობთ და ვზრუნავთ ჩვენი მუნიციპალიტეტის განვითარებისა და წარმატებისთვის.
ჩემთვის დიდი პატივი იყო ამ პერიოდის განმავლობაში ვყოფილიყავი თქვენი მსახური, რაც ამავდროულად უდიდეს პასუხისმგებლობას გულისხმობდა.
ჩემთვის ყოველთვის უმნიშვნელოვანესი იყო, არის და იქნება სწორ ღირებულებებსა და ფასეულობებზე დაფუძნებული ადამიანური ურთიერთობები, კეთილსინდისიერება პირად ურთიერთობებში, საჯარო სამსახურსა თუ პოლიტიკაში.
შექმნილი პოლიტიკური ვითარებიდან გამომდინარე, მიზანშეწონილად მიმაჩნია დავტოვო ზუგდიდის მუნიციპალიტეტის მერის თანამდებობა.
ჩემო ზუგდიდელებო!
ჩემი მერობის პერიოდში მუდმივად ვგრძნობდი თქვენი მხრიდან განსაკუთრებულ კეთილგანწყობასა და თანადგომას, რისთვისაც გიხდით მადლობას.
ამ გამოწვევების წინაშე მარტო არ ვყოფილვარ. ჩემს გვერდით ყოველთვის იდგნენ გამორჩეული კვალიფიკაციის მქონე საჯარო მოხელეები. მადლობა მათ ღირსეული მსახურებისთვის“, – წერს გიორგი შენგელია.
მოგვიანებით, მან მედიასთან დამატებითი განმარტებაც გააკეთა.
მისი თქმით, ის არ აპირებს რომელიმე პოლიტიკურ გუნდს შეუერთდეს და ფიქრობს, რომ კერძო სექტორში გადაინაცვლებს.
შეკითხვაზე, გამორიცხავს თუ არა გიორგი გახარიასთან ურთიერთობას, ის პასუხობს, რომ გამორიცხვით არასდროს არაფერს გამორიცხავს.
„თუ ზუგდიდელებს და ქვეყანას დასჭირდება ჩემი გვერდით დგომა, მზად ვარ, ვიყო იქ, სადაც აუცილებელი იქნება“, – თქვა გიორგი შენგელია.
