1 ივლისს ევროკომისარი გაფართოების საკითხებში მარტა კოსი სომხეთში ჩადის, Politico-ს ცნობით, მასთან ერთად იქნება ევროკომისიის პრეზიდენტი ურსულა ფონ დერ ლაიენიც.
გამოცემა წერს, რომ მიზანი სომხეთის პრო-ევროპული მთავრობის მხარდაჭერაა.
ეს იქნება ურსულა ფონ დერ ლაიენის მეორე ვიზიტი სომხეთში 2 თვეზე ნაკლებ დროში.
1 ივლისს დაგეგმილი ვიზიტი, რომლის დეტალებიც ჯერ საბოლოოდ შეთანხმებული არ არის, იმართება იმ პერიოდში, როცა ნიკოლ ფაშინიანი 7 ივნისის საპარლამენტო არჩევნებში გამარჯვების შემდეგ ცდილობს, სომხეთი კიდევ უფრო მეტად დააშოროს მოსკოვს და გააღრმავოს კავშირები ევროკავშირთან. 7 ივნისის არჩევნები ფართოდ იქნა აღქმული, როგორც რეფერენდუმი ქვეყნის გეოპოლიტიკური მომავლის შესახებ.
„ვხედავთ, რომ ქვეყანა რუსეთის მხრიდან ინტენსიური და მუდმივი ზეწოლის ქვეშაა; ასეთი ვიზიტი ძლიერი მხარდაჭერის სიგნალი იქნება და შეავსებს იმ პრაქტიკულ დახმარებას, რომელიც უკვე გაიცა,“ – უთხრა Politico-ს ევროკავშირის ერთ-ერთმა ოფიციალურმა პირმა, რომელიც ვიზიტის მომზადებაში მონაწილეობს. მან ანონიმურობის დაცვა ითხოვა, ისევე როგორც სხვა წყაროებმა, რომლებმაც დაგეგმილი ვიზიტის შესახებ გამოცემას ინფორმაცია მიაწოდეს.
გამოცემის წყაროების ცნობით, კოსის და ფონ დერ ლაიენის მესიჯი იქნება: „ევროპა თქვენ გვერდითაა“.
გასულ კვირას ევროკავშირმა დაადასტურა, რომ სომხეთს 34 მილიონ ევროს გამოუყოფს, რათა შეამსუბუქოს რუსეთის მიერ სომხურ ექსპორტზე დაწესებული ახალი შეზღუდვების გავლენა და ხელი შეუწყოს სავაჭრო ურთიერთობების დივერსიფიკაციას ევროპული ბაზრების მიმართულებით. ევროკავშირს ასევე განთავსებული ჰყავს სამოქალაქო სადამკვირვებლო მისია სომხეთ-აზერბაიჯანის საზღვარზე.
