საქართველოს დამოუკიდებლობის დღის, 26 მაისისადმი მიძღვნილი ზოგიერთი ღონისძიების ნაწილობრივი დაფინანსებისების მიზნით, მთავრობის სარეზერვო ფონდიდან 8 081 647 ლარი გამოიყოფა. ამის შესახებ მთავრობის 8 მაისის განკარგულებაში წერია.
აღნიშნული თანხა მიმართულია თბილისსა და რეგიონებში საზეიმო ღონისძიებებთან დაკავშირებული აქტივობების ორგანიზებაზე.
მათ შორის, თბილისში, 9 აპრილის სახელობის ბაღსა და ორბელიანის ქუჩის მიმდებარე ტერიტორიაზე მოეწყობა შემეცნებით-გასართობი სივრცეები. ასევე გაიმართება გალა კონცერტი, რომელშიც მონაწილეობას მიიღებენ მოწვეული მუსიკოსები, ღონისძიება პირდაპირ ეთერში გადაიცემა.
გარდა ამისა, 17:10 საათზე – იმ დროს, როდესაც საქართველოს დამოუკიდებლობა გამოცხადდა საზეიმო აღნიშვნა იქნება პრეზიდენტის სასახლისა და მიმდებარე ტერიტორიაზე, დამატებით, ამ დროს საქართველოს ჰიმნი აჟღერდება როგორც სადგურებზე, ისე მატარებლებში.
ზემოთხსენებული თანხა გადანაწილებულია სხვადასხვა სამინისტროზე, კერძოდ:
თავიდაცვის სამინისტროს – 2 422 778 ლარი;
კულტურის სამინისტრო – 2 000 000 ლარი;
რეგიონული განვითარების სამინისტრო – 825 000 ლარი;
ინფრასტრუქტურის სამინისტრო – 695 259 ლარი;
გარემოს დაცვისა და სოფლის მეურნეობის სამინისტრო – 692 555 ლარი;
შერიგებისა და სამოქალაქო თანასწორობის საკითხებში სახელმწიფო მინისტრის აპარატი – 660 220 ლარი;
იუსტიციის სამინისტრო – 470 000 ლარი;
ჯანდაცვის სამინისტრო – 315 835 ლარი.
ღონისძიებების შესახებ კი ვრცლად, 25 მარტის განკარგულებით გახდა ცნობილი.
