პრემიერ-მინისტრის, ირაკლი კობახიძის განცხადებით, საზოგადოებრივ მაუწყებელს სთავაზობენ ხვალ, 4 დეკემბერს, ეთერი დაუთმოს მას, შალვა პაპუაშვილს, საგარეო საქმეთა ყოფილ მინისტრს, მიხეილ ჯანელიძესა და თავდაცვის ყოფილ მინისტრ, თინა ხიდაშელს შორის დისკუსიას.
„ოცნების“ პრემიერმა საჯარო დისკუსია შესთავაზა იმ ადამიანებს, რომლებიც აპროტესტებენ პარტიის გადაწყვეტილებას ევროინტეგრაციის პროცესის შეჩერებაზე. დღეს კობახიძემ თქვა, რომ დისკუსიის მსურველებს ხვალ მთავრობის ადმინისტრაციაში იწვევს.
„როგორც საზოგადოებისთვის ცნობილია, უკვე არაერთგზის გამოვხატეთ ჩვენი მზადყოფნა, გავმართოთ საჯარო დისკუსია ადამიანებთან, რომლებიც ჩვენი გუნდის მიერ 28 ნოემბერს გაკეთებულ განცხადებას აპროტესტებენ. ამგვარ საჯარო დისკუსიაში ჩართვის ინტერესი უკვე გამოთქვეს ყოფილმა პოლიტიკოსებმა, მიხეილ (პაპუნა) ჯანელიძემ და თინათინ ხიდაშელმა. საქართველოს პარლამენტის თავმჯდომარესთან, შალვა პაპუაშვილთან ერთად, ვთავაზობ საზოგადოებრივ მაუწყებელს, ხვალ, 4 დეკემბერს, დაგვითმოს ეთერი მათთან საჯარო დისკუსიის გასამართად“, – აცხადებს კობახიძე.
28 ნოემბერს ირაკლი კობახიძემ ბრიფინგზე თქვა, რომ „ქართული ოცნება” გაწევრების შესახებ ევროკავშირთან მოლაპარაკებების გახსნის საკითხს აჩერებს. მისი თქმით, 2028 წლის ბოლომდე დღის წესრიგში არ დააყენებენ ევროკავშირთან მოლაპარაკებების გახსნის საკითხს და ასევე 2028 წლის ბოლომდე უარს ამბობენ ყოველგვარ საბიუჯეტო გრანტზე ევროკავშირის მხრიდან.
ამ გადაწყვეტილებას მეექვსე დღეა თბილისსა და სხვა ქალაქებში მოქალაქეები აპროტესტებენ. პარლამენტთან აქციებზე ჯამში 200-ზე მეტი ადამიანი დააკავეს. სპეცრაზმი იყენებს წყლის ჭავლს, ცრემლმდენ გაზს, წიწაკის სპრეის, სცემს აქციის მონაწილეებს.
