საქართველოს მთავრობის სხდომაზე პრემიერ-მინისტრი ირაკლი ღარიბაშვილი აქონდროპლაზიის დიაგნოზის მქონე ბავშვების მშობლების პროტესტს გამოეხმაურა და განაცხადა, რომ „უპასუხისმგებლო პოლიტიკოსები“ მათ საკუთარი მიზნებისთვის იყენებენ.
ღარიბაშვილის თქმით, აქონდროპლაზიის სამკურნალო მედიკამენტზე ჯანდაცვის სამინისტრომ, ავტორიტეტულმა ექიმებმა და ჯანდაცვის მსოფლიო ორგანიზაციამ ამომწურავი განმარტება გააკეთეს, თუმცა შეკითხვები მაინც რჩება და „ხდება გაუგონარი რამ“.
„უპასუხისმგებლო პოლიტიკოსები, რომელბიც გამოირჩევიან სიყალბით და ფარისევლობით, აქაც ცდილობენ აი ეს უმწიკვლო, უმწეო ბავშვები დაიყენონ წინ და აწარმოონ პოლიტიკური კამპანია“, – განაცხადა მან.
პრემიერმა მშობლებს თანადგომა გამოუცხადა და სთხოვა, „ნუ გამოაყენებინებენ თავს და ნუ მიიღებენ მონაწილეობას პოლიტიკურ კამპანიაში ნებსით თუ უნებლიედ“.
„მინდა, ყველას შევახსენო, ალბათ, გახსოვთ, არავის არ გახსენებია, არც ერთ პოლიტიკოსს, რომელიც ახლა ჩართულია ამ კამპანიაში, ამ ბავშვების ბედი, არც მათი მდგომარეობა, არაფერი. არც მაშინ, როცა იყვნენ ხელისუფლებაში და არც მაშინ, როცა არიან ოპოზიციაში.
მარტივად შეიძლება ამის ახსნა, ცდილობენ, ყველა უბედურება, განსაცდელში, გაჭირვებაში მყოფი ადამიანის ბედი გამოიყენონ პოლიტიკური ინტერესების მისაღწევად, რაც ამორალური საქციელია, უზნეობა, ყველაზე ზნედაცემული ქმედება, რაც შეიძლება, ადამიანმა იკადროს, როცა ვხედავთ, ამ იშვიათი გენეტიკური დაავადების მქონე ადამიანების ჩართულობით უნდათ, პოლიტიკურ მიზნებს მიაღწიონ“, – აღნიშნა მან.
ღარიბაშვილმა პოლიტიკოსებსაც მიმართა, ნუ იყენებენ აქონდროპლაზიის დიაგნოზის მქონე ბავშვებს და მათ მშობლებს პარტიული ინტერესებისთვის.
„მინდა, მივმართო ამ ყალბ, ფარისეველ პოლიტიკოსებს, მათი ეს ყოველგვარი ამორალური ქმედება დაასრულონ და ნუ იყენებენ ამ ადამიანებს და ამ ადამიანების მშობლებს ვიწროპარტიული ინტერესებისთვის“, – განაცხადა მან.
აქონდროპლაზიის მქონე ბავშვთა მშობლები საპროტესტო აქციებს რამდენიმე თვეა, მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ.
მშობლების პროტესტის პასუხად მარტში შეიქმნა აქონდროპლაზიის საკითხებზე მომუშავე უწყებათაშორისი ჯგუფი, რომელიც ამ იშვიათი დაავადების სამკურნალო სტრატეგიის ჩამოყალიბებას ისახავს მიზნად.
