რუსული კანონი ისევ პარლამენტშია – კანონპროექტი ფრაქცია „ქართულმა ოცნებამ“ პარლამენტში 3 აპრილს დაარეგისტრირა.
კანონპროექტით შემოდის ტერმინი „უცხოური ძალა“. ამ დეფინიციაში ერთიანდება ფონდი, ასოციაცია, კორპორაცია, კავშირი და ა.შ., რომელიც დაფუძნებულია უცხო სახელმწიფოს ან საერთაშორისო სამართლის საფუძველზე.
კანონპროექტით, ასევე გაჩნდება ტერმინი – „უცხოური ძალის ინტერესების გამტარებელი ორგანიზაცია“
კანონპროექტით, ამ განსაზღვრებას დაექვემდებარება:
- ა(ა)იპ – არაკომერციული იურიდიული პირი, რომლის მიერ წლის განმავლობაში მიღებული შემოსავლის 20%-ზე მეტის წყარო „უცხოური ძალაა“.
- ისეთი მაუწყებელი, რომლის მიერ წლის განმავლობაში მიღებული მთლიანი შემოსავლის 20%-ზე მეტის წყარო უცხოური ძალაა (მასში არ შედის მაუწყებელში განთავსებული სპონსორობიდან, ტელეშოპინგიდან ან კომერციული რეკლამიდან მიღებული შემოსავალი).
- იურიდიული პირი, რომელიც ფლობს საქართველოში მოქმედ მასობრივი ინფორმაციის გამავრცელებელ ბეჭდურ ან ინტერნეტსაშუალებებს და რომელთა მიერ წლის განმავლობაში მიღებული შემოსავლის 20%-ზე მეტის წყარო უცხოური ძალაა.
რეგისტრაციისა და დეკლარაციის წარდგენის ვალდებულება:
კანონპროექტი ადგენს უცხოური ძალის ინტერესების გამტარებელ ორგანიზაციად რეგისტრაციის ვალდებულებას.
- სუბიექტი ვალდებული იქნება, მიმართოს საჯარო რეესტრს განცხადებით უცხოური ძალის ინტერესების გამტარებელ ორგანიზაციად დარეგისტრირების თაობაზე.
- ამგვარ ორგანიზაციად რეგისტრირებული სუბიექტი კი ვალდებული იქნება წარადგინოს საფინანსო დეკლარაცია;
დეკლარაციაში მათ შორის უნდა აისახოს – ინფორმაცია ფულადი თანხისა და სხვა სახის მატერიალური სარგებლის წყაროს, ოდენობისა და მიზნობრიობის შესახებ;
სააგენტო შეისწავლის დეკლარაციას, რისთვისაც იუსტიციის სამინისტროს უფლებამოსილ პირს უფლება აქვს, მოიძიოს საჭირო ინფორმაცია, მათ შორის, პერსონალური მონაცემი.
მონიტორინგის შესაძლებლობა:
- უცხოური ძალის ინტერესების გამტარებელი ორგანიზაციის გამოსავლენად ან ამ კანონის რომელიმე მოთხოვნის შესრულების შესამოწმებლად იუსტიციის სამინისტრო უფლებამოსილია, ნებისმიერ დროს განახორციელოს საკითხის „სათანადო კვლევა“ და შესწავლა – მონიტორინგი;
მონიტორინგის დაწყების საფუძველია:
- იუსტიციის სამინისტროს შესაბამისი უფლებამოსილი პირის გადაწყვეტილება;
- იუსტიციის სამინისტროსთვის წარდგენილი წერილობითი განცხადება, რომელიც შეიცავს უცხოური ძალის ინტერესების გამტარებელ კონკრეტულ ორგანიზაციასთან დაკავშირებულ სათანადო მინიშნებას.
ერთი და იმავე სუბიექტის მიმართ მონიტორინგი დასაშვებია 6 თვეში მხოლოდ ერთხელ. მონიტორინგის წესს იუსტიციის მინისტრი ადგენს.
თუ მონიტორინგის შედეგად გამოვლინდა, რომ რომელიმე სუბიექტმა რეგისტრაციას თავი აარიდა, სააგენტო მას სამინისტროს მიმართვის საფუძველზე დაარეგისტრირებს.
ჯარიმები:
უცხოური ძალის ინტერესების გამტარებელ ორგანიზაციად რეგისტრაციისთვის თავის არიდება ან დეკლარაციის დადგენილ ვადაში წარუდგენლობა – გამოიწვევს 25 000 ლარით დაჯარიმებას;
სააგენტოსთვის განაცხადის წარდგენის შეუსრულებლობა, განაცხადსა და დეკლარაციაში ხარვეზის გამოსწორებისთვის ვადის დარღვევა – 10 000 ლარით დაჯარიმდება.
ერთი თვის ვადაში იგივე ქმედების ჩადენა 20 000 ლარით დაჯარიმდება.
