ფარმაცევტული კომპანია AstraZeneca უარყოფს ინფორმაციას, თითქოს მისი ვაქცინა 65 წელს ზემოთ მყოფი ადამიანებისთვის ნაკლებად ეფექტიანია.
ვაქცინის შესაძლო არაეფექტიანობაზე ინფორმაცია გერმანულ მედიაში გავრცელდა. წერდნენ, რომ AstraZeneca-ს ევროკავშირისგან შესაძლოა, ნებართვა ვერ მიეღო ხანშიშესული ადამიანების ვაქცინაციისთვის. გერმანული გაზეთების Handelsblatt-სა და Bild-ის მიხედვით, ვაქცინის ეფექტიანობა 65 წელს ზემოთ მყოფ პირებში 10%-ზე ნაკლები იყო.
ამის გამო, გერმანიის ოფიციალური პირები შიშობდნენ, რომ ოქსფორდის უნივერსიტეტისა და AstraZeneca-ს ერთობლივ ვაქცინას ევროკავშირის შესაბამისი ორგანო – EMA ხანშიშესული ადამიანების ვაქცინაციისთვის არ დაამტკიცებდა. გავრცელებული ინფორმაციით, AstraZeneca-ს ვაქცინის წარმოებასთანაც ჰქონდა შეფერხება. რამაც, როგორც The Reuters წერს, ევროპის ქვეყნები შეაშფოთა.
თუმცა, The Reuters წერს, რომ კომპანია AstraZeneca გამოეხმაურა გავრცელებულ ინფორმაციას და მას „სრულიად არასწორი“ უწოდა. კომპანიის განცხადებით, დიდი ბრიტანეთის ვაქცინაციისა და იმუნიზაციის კომიტეტი მხარს უჭერდა ხანშიშესული ადამიანების აცრას მათი ვაქცინით. რომელთა ანალიზმაც შემდეგ ძლიერი იმუნიტეტი აჩვენა.
