საქართველოს საგარეო საქმეთა სამინისტრო facebook-ის ოფიციალურ გვერდზე ქარდს აქვეყნებს ქვესათაურით – „ჰუმანიტარული დახმარება და სოლიდარობა” და ჩამოთვლის:
- 1 მილიონი ლარის ჰუმანიტარული დახმარება უკრაინას;
- დახმარება საქართველოში მყოფ ვიზიტორ უკრაინელებს;
- 24/7 ცხელი ხაზი უკრაინელი ტურისტებისთვის;
- თბილისის ანძა და ბათუმის სტადიონი უკრაინის სახელმწიფო დროში ფერებში;
- პრეზიდენტის სასახლეზე უკრაინის და საქართველოს დროშები;
- „საქართველოს ფოსტა” უფასოდ აგზავნის ჰუმანიტარული დანიშნულების ამანათების უკრაინის მიმართულებით.
მათივე თქმით, საქართველომ, უკრაინაში მიმდინარე მოვლენების გათვალისწინებით, მყისიერად დააფიქსირა მზაობა და განახორციელა ქვეყნის ჰუმანიტარული დახმარება სხვადასხვა მიმართულებით.
facebook-პოსტში უკრაინისადმი მხარდაჭერის ნაწილში მოყვანილია პრემიერის, საგარეო საქმეთა მინისტრისა და პრეზიდენტის განცხადებებიც. ასევე, აღნიშნულია, რომ საქართველო მხარს უჭერს უკრაინის სუვერენიტეტსა და ტერიტორიულ მთლიანობას საერთაშორისო ორგანიზაციებში:
- „საქართველო მიუერთდა ევროკავშირის დეკლარაციას რუსეთის ფედერაციის შეიარაღებული ძალების მიერ უკრაინაში შეჭრის თაობაზე.
- თანასპონსორობა გაუწია გაეროს უსაფრთხოების საბჭოს რეზოლუციას რუსეთის მიერ უკრაინაში შეჭრის შესახებ.
- მხარი დაუჭირა ევროპის საბჭოს მინისტრთა კომიტეტის გადაწყვეტილებას რუსეთისთვის მინისტრთა კომიტეტსა და საპარლამენტო ასამბლეაში წარმომადგენლობითი უფლების შეჩერების შესახებ.
- ეუთო-ს მუდმივი საბჭოს გაძლიერებულ სხდომაზე შეშფოთება გამოთქვა რუსეთის მიერ უკრაინის წინააღმდეგ განხორციელებული აგრესიის გამო და ხაზი გაუსვა საერთაშორისო თანამეგობრობის ერთიანი და მტკიცე პასუხის აუცილებლობას.
- მიუერთდა ყირიმის საერთაშორისო პლატფორმის ერთობლივ განცხადებას და კიდევ ერთხელ გამოთქვა მხარდაჭერა უკრაინის ტერიტორიული მთლიანობისა და სუვერენიტეტის მიმართ.
- გაეროს გენერალური ასამბლეის მეთერთმეტე საგანგებო სესიაზე საქართველოს წარმომადგენელმა გააკეთა ეროვნული განცხადება და მოუწოდა რუსეთის ფედერაციას დაუყოვნებლივ შეწყვიტოს სამხედრო მოქმედებები და გაიყვანოს სამხედრო ძალები უკრაინის ტერიტორიიდან”, – წერს სამინისტრო.
