ისრაელის საელჩო, გამომცემლობა „ინტელექტთან“ პარტნიორობით, მოკლე მოთხრობების კონკურსს აცხადებს. აღნიშნული კონკურსი იუნესკოს მიერ თბილისის 2021 წლის წიგნის მსოფლიო დედაქალაქად დასახელებას უკავშირდება და შემდეგი პირობებით ჩატარდება:
- კონკურსში მონაწილეობას შეძლებენ საქართველოს მოქალაქე 35 წლამდე ასაკის ავტორები, რომელთა ნაშრომები ამ დრომდე წიგნად არ გამოცემულა;
- მოთხრობა დაწერილი უნდა იყოს ქართულ ენაზე და არ აღემატებოდეს 20 გვერდს (ერთი გვერდი გულისხმობს, Sylfaen-ის 11-იანი შრიფტით აკრეფილ Word-ის ერთ გვერდს);
- ამბავი უნდა ეხებოდეს (მათ შორის) ებრაელებს და/ან ისრაელის თემატიკას და დაკავშირებული იყოს თბილისსა და ქართულ საზოგადოებასთან;
- საელჩო არ განსაზღვრავს თუ რა კონკრეტული კუთხით იქნება დანახული და გადმოცემული საქართველოსა და ისრაელის/ებრაული თემის ურთიერთობა. შესაბამისად, ავტორებს შეუძლიათ გაამახვილონ ყურადღება ორმხრივ მეგობრობაზე, ტრადიციებზე და ისტორიაზე; ან პირიქით – ამ ურთიერთობის კრიტიკულ ასპექტებზე და რაიმე სერიოზული სოციალური საკითხი/პრობლემა წამოჭრან. საელჩო არ მიიჩნევს საჭიროდ, ჩაერიოს მოთხრობის შინაარსსა თუ მის ქვეტექსტსა და გზავნილში.
ნამუშევრები შეფასდება დამოუკიდებელი ჟიურის წევრების მიერ მხოლოდ მათი მხატვრული ღირებულების შესაბამისად.
- მოთხრობებს შეაფასებს კომპეტენტური ჟიური – გამორჩეული მწერლები და ინტელექტუალები;
- 10 გამარჯვებული მოთხრობა ანთოლოგიის სახით გამოიცემა გამომცემლობა „ინტელექტის“ მიერ;
- პირველი სამი ადგილის მფლობელი მიიღებს 1’500, 1’000 და 500 ლარის ჯილდოს;
- მოთხრობები უნდა გამოაგზავნოთ ელ. მისამართზე: Competition.israelingeorgia@gmail.com არაუგვიანეს 1 ივნისისა.
