მძიმე პოლიტიკური კრიზისი, რომელშიც ქვეყანა შევიდა - NGO-ები განცხადებას ავრცელებენ

პუბლიკა

არასამტავრობო ორგანიზაციები მიიჩნევენ, რომ საქართველოს პარლამენტის მიერ დღეს ჩაგდებული საკონსტიტუციო ცვლილებების პაკეტი, რომელიც  მომდევნო საპარლამენტო არჩევნების სრულად პროპორციული სისტემით ჩატარებას გულისხმობდა, ქვეყნის დემოკრატიული განვითარებისათვის შესაძლოა საბედისწერო აღმოჩნდეს.

ორგანიზაციებში ამბობენნ, რომ პროპორციულ საარჩევნო სისტემაზე გადასვლა არ იყო მხოლოდ რომელიმე პოლიტიკოსის დაპირება ან საზოგადოების მცირე ჯგუფის ახირება. ის მთელი საზოგადოების მოთხოვნა იყო, რომელსაც მხარს უჭერს ფაქტობრივად ყველა პოლიტიკური პარტია და საზოგადოებრივი ჯგუფი.

NGO-ები ამ გადაწყვეტილებაზე სრული პასუხისმგებლობას მმართველი პარტიის თავმჯდომარეს აკისრებენ.

„არაფორმალური მმართველი ბიძინა ივანიშვილი საკუთარი ძალაუფლების შესანარჩუნებლად და სახელმწიფოს მისატაცებლად, როგორც ჩანს, მზად არის უსამართლო საარჩევნო სისტემის გამოყენებით ამომრჩეველს წაართვას ქვეყნის მართვაში მონაწილეობის შესაძლებლობა და დაუმსახურებლად მიისაკუთროს  საპარლამენტო მანდატები.

ხელისუფლებისთვის ცხადი იყო, რომ მიღებული გადაწყვეტილება მასობრივ საზოგადოებრივ მღელვარებას გამოიწვევდა და გვაქვს საფუძველი ვივარაუდოთ, რომ ის ბოლო დღეებში თავად უწყობდა ხელს ამ მღელვარების წარმოშობას, რაც შესაძლოა განპირობებული ყოფილიყო ძველი საარჩევნო სისტემით ვადამდელი საპარლამენტო არჩევნების ჩატარებისა და ამ გზით ხელისუფლების შენარჩუნების  სურვილით.

მოვუწოდებთ ბიძინა ივანიშვილს და „ქართულ ოცნებას”, გაიაზროს ის მძიმე პოლიტიკური კრიზისი რომელშიც ქვეყანა შევიდა და მიიღოს ყველა პოლიტიკური ზომა მის დასაძლევად, რომლის ერთადერთ და უალტერნატივო გზად პარლამენტის მიერ სრულად პროპორციული საარჩევნო სისტემის დაუყოვნებლივ მიღება წარმოადგენს, “- ნათქვამია არასამთავრობო ორგანიზაციების მიერ გავრცელებულ განცხადებაში.

განცხადებას ხელს აწერენ: საქართველოს დემოკრატიული ინიციატივა (GDI); სამართლიანი არჩევნებისა და დემოკრატიის საერთაშორისო საზოგადოება (ISFED); დემოკრატიისა და უსაფრთხო განვითარების ინსტიტუტი (IDSD); საქართველოს ღია საზოგადოების ფონდი (OSGF); ადამიანის უფლებების სწავლებისა და მონიტორინგის ცენტრი (EMC) ; პარტნიორობა ადამიანის უფლებებისთვის (PHR); საერთაშორისო გამჭვირვალობა – საქართველო (TI Georgia); საქართველოს რეფორმების ასოციაცია (GRASS) ; საზოგადოება და ბანკები; საქართველოს ახალგაზრდა იურისტთა ასოციაცია (GYLA); ტოლერანტობის და მრავალფეროვნების ინსტიტუტი (TDI); ადამიანის უფლებათა ცენტრი (HRC); საქართველოს პოლიტიკის ინსტიტუტი (GIP); მსოფლიო გამოცდილება საქართველოსთვის  ; მმართველობითი სისტემების განვითარების ცენტრი; საქართველოს მედია-კლუბი;