მომღერალი და „ნაციონალური მოძრაობის“ საპარლამენტო სიის პირველი ნომერი ბუბა კიკაბიძე „ქართული ოცნების“ დამფუძნებელს, ბიძინა ივანიშვილს მიმართავს, გაათავისუფლოს საქართველოს მესამე პრეზიდენტი მიხეილ სააკაშვილი.
„მინდა, ბიძინას ვუთხრა, არ ვიცი სად არის, გამოუშვას მიშა სააკაშვილი იმიტომ, რომ მიზანმიმართულად კლავენ და თუ გამოუშვა, მაგის შვილიშვილებს ეტყვიან მადლობას მერე. ეს არის ჩემი თხოვნა. „ბაკლანებთან“ ლაპარაკი არააქ აზრი იმიტომ, რომ მაგათი დირექტორია ერთი კაცი, ბიძინა ივანიშვილი. ეგ არის. თუ ჩააკვდათ ხელში, საქართველოში დედა შვილს ვერ აიყვანს. ჩვენი სირცხვილი იქნება, რამე რომ მოხდეს. ამას ერი ვერ მოიწმინდავს რამდენიმე საუკუნე, ისტორიაში შევა ეს ამბავი და ძლივს გაგვიჩნდა ნამდვილი პოლიტიკოსი, ერთი. საავადმყოფოში რომ გადაიყვანონ და ცოტა გამოაცოცხლონ, არაფერი არ უნდა იმ კაცს, ნუ ეშინიათ. ამათ ეშინიათ მაგისი გაშვება. ნუ ეშინიათ იმიტომ რომ ერთია, რა“, – ამბობს კიკაბიძე გადაცემა „სხვა ნანუკაში“.
ბუბა კიკაბიძე, როგორც პარლამენტის წევრი, დღეს საკანონმდებლო ორგანოში მივიდა. „მთავარი არხის“ ცნობით, კიკაბიძეს არავისთან შეხვედრის გეგმა არ აქვს და მან მხოლოდ პარლამენტის ბანერთან უნდა გადაიღოს დეპუტატის ვებგვერდისთვის საჭირო ფოტო. მედიის ცნობით, ის საკანონმდებლო საქმიანობაში აქტიურად ჩართვას არ აპირებს, თუმცა, სავარაუდოდ მონაწილეობას მიიღებს სხვადასხვა საკითხის კენჭისყრაში, მათ შორის, სააკაშვილის საქმეზე საგამოძიებო კომისიის შექმნაში.
