მიხეილ სააკაშვილის ინფორმაციით, გუშინ, 13 მარტს რესპუბლიკურ კლინიკაში გამოკვლევებისთვის გადაიყვანეს. საქართველოს მესამე პრეზიდენტი, რომელიც სასჯელს რუსთავის მე-12 პენიტენციურ დაწესებულებაში იხდნის, რამდენიმე თვეა, კომპლექსური გამოკვლევისთვის სათანადო კლინიკაში გადაყვანას მოითხოვს.
სააკაშვილის ცნობით, გამოკვლევით დაუდასტურდა სამედიცინო კონსილიუმის დიაგნოზი – ნეიროპათია, ვერნიკეს ენცეფალოპათია და გასტროსკოპიის შედეგად დაუდგინდა მრავალრიცხოვანი ეროზია.
„გუშინ, მრავალთვიანი მოთხოვნის შემდეგ, გვიან საღამოს ჩვენს დროს ხელახლა აშენებულ რესპუბლიკურ საავადმყოფოში მიმიყვანეს. იქ ელექტრო ნეირომიოგრაფია და გასტროსკოპიული გამოკვლევა ჩამიტარდა. პირველმა პროცედურამ მთლიანად დაადასტურა სხვადასხვა კონსილიუმის დიაგნოზი იმის შესახებ, რომ პენიტენციურ სისტემაში მე დამმართეს ნეიროპათია, როცა ვეღარ გრძნობ კიდურებს და სხეულის სხვადასხვა მონაკვეთს და ვერნიკეს ენცეფალოპათია, რაც მოძრაობისა და კოორდინაციის დარღვევას, მეხსიერების გაქრობასა და ა.შ. იწვევს. გასტროსკოპიამ კი აჩვენა მრავალრიცხოვანი ეროზიები, ნუ არც იყო გასაკვირი.
რესპუბლიკურის ექიმებმა მითხრეს, რომ თუ სერიოზული მკურნალობა დაუყოვნებლივ არ ჩატარდა, ეს დაავადება სწრაფად გაუარესდება და დასრულდება ინვალიდიზაციით ან სიკვდილით. ქართულ პენიტენციურ სისტემაში ამ დაავადებების სრულფასოვნად მკურნალობა აბსოლუტურად გამორიცხულია. ვფიქრობ, ჩემ წინააღმდეგ განხორციელებული ძალადობა თავიდანვე გათვლილი იყო ასეთ შედეგზე. ამ ყველაფერს ვწერ იმიტომ, რომ იუსტიციის სამინისტრო, გუშინდელ დიაგნოზს, როგორც ყოველთვის, გაასაიდუმლოებს“, – წერს სააკაშვილი სოციალურ ქსელში.
