NATO-მ შვედეთი და ფინეთი ალიანსში ოფიციალურად მიიწვია

პუბლიკა

მას შემდეგ, რაც თურქეთმა შვედეთისა და ფინეთის ალიანსში გაწევრებაზე თანხმობა განაცხადა, მადრიდის სამიტზე NATO-მ სკანდინავიური ქვეყნები ალიანსში ოფიციალურად მიიწვია.

„ფინეთისა და შვედეთის ალიანსში გაწევრება მათ უფრო დაცულს გახდის, NATO-ს – უფრო ძლიერს, ევროატლანტიკურ სივრცეს კი მეტად უსაფრთხოს.

ფინეთისა და შვედეთის უსაფრთხოება ალიანსისთვის მნიშვნელოვანი საკითხია, მათ შორის, გაწევრების პროცესში“, – ნათქვამია NATO-ს წევრი სახელმწიფოების ლიდერთა განცხადებაში.

შვედეთი და ფინეთი NATO-ში გაწევრების პროცედურას დაიწყებენ, თავის მხრივ კი ალიანსის 30-ვე წევრი ქვეყნის პარლამენტმა მათი წევრობის რატიფიცირება უნდა მოახდინოს.

ამას, NATO-ს გენერალური მდივნის იენს სტოლტენბერგის თქმით, გარკვეული დრო დასჭირდება, მაგრამ იმედოვნებს, რომ რატიფიცირების პროცესი მალე დასრულდება. სტოლტენბერგის თქმით, ალიანსის წევრმა სახელმწიფოებმა გამოხატეს მზაობა, რომ რაც შეიძლება სწრაფად გაიარონ რატიფიცირების პროცესი.

LB loan image desktop LB loan image mobile