თურქეთის ხელისუფლებამ სულ მცირე 47 ადამიანი დააკავა ლგბტქ+ ორგანიზაციების ოფისებში ჩატარებული რეიდების შემდეგ. პროკურატურის განცხადებით, დაკავებები „პროსტიტუციისა და უხამსობის საქმეზე“ მიმდინარე გამოძიების ფარგლებში განხორციელდა.
ხელისუფლების განცხადებით, ეს ღონისძიებები იმ კამპანიის ნაწილია, რომლის მიზანიც „ოჯახური ღირებულებების დაცვაა“.
სტამბოლის მთავარი პროკურატურის განცხადებით, ოპერაციები შაბათ-კვირას 12 პროვინციაში ჩატარდა და 38 ადამიანს შეეხო, მათგან 26 ადამიანი დააკავეს. სამართალდამცველებმა ამოიღეს ნარკოტიკული საშუალებები, ციფრული მოწყობილობები, კონტრაბანდული ალკოჰოლი და ცეცხლსასროლი იარაღი.
ანკარის მთავარმა პროკურატურამ განაცხადა, რომ კიდევ 21 ადამიანი დააკავეს ლგბტქ+ ასოციაცია Kaos GL-ის წინააღმდეგ მიმდინარე გამოძიების ფარგლებში, ხოლო ხუთი პირის ძებნა კვლავ გრძელდება.
Kaos GL-ის განცხადებით, დაკავებულია სულ მცირე 50 აქტივისტი, მათ შორის 10-ზე მეტი ადამიანი, რომლებიც პოლიციამ საკუთარ სახლებში ჩატარებული რეიდების დროს დააკავა.
გარდა ამისა, ორგანიზაციის ინფორმაციით, ხელისუფლებამ შეზღუდა წვდომა ათობით ვებსაიტსა და სოციალური მედიის ანგარიშზე, რომლებიც დაკავშირებულია ლგბტქ+ ორგანიზაციებთან, აქტივისტებსა და უფლებადამცველებთან.
მთავრობის მიერ დაწყებული კამპანია სახელწოდებით „ჩემი ოჯახი დაცულია“ მიმდინარეობს „ოჯახისა და მოსახლეობის ათწლეულის“ ინიციატივის პარალელურად, რომელსაც პრეზიდენტი რეჯეფ თაიფ ერდოღანი უჭერს მხარს. ინიციატივის მიზნად სახელდება შობადობის შემცირების და მოსახლეობის დაბერების პრობლემებთან გამკლავება.
უფლებადამცველი ორგანიზაციები თურქეთის მთავრობას ბოლო წლებში ლგბტქ+ თემის წინააღმდეგ მზარდი ზეწოლის განხორციელებაში ადანაშაულებენ, რაც, მათი შეფასებით, უფრო მკაცრი რიტორიკისა და ახალი შეზღუდვების დაწესებით გამოიხატება.
„რეალურად, ეს ოპერაცია არის სახელმწიფოს მიერ მართული დისკრიმინაცია, შიშზე დაფუძნებული პოლიტიკა და სამოქალაქო საზოგადოების დემონტაჟი“, – განაცხადა თურქეთის ადამიანის უფლებათა ასოციაციამ X-ზე.
ევროპარლამენტის თურქეთის საკითხებში მომხსენებელმა ნაჩო სანჩეს ამორმა, დაკავებების მასშტაბური ტალღა რეპრესიების „შოკისმომგვრელ გამწვავებად“ შეაფასა.
„მორალური დღის წესრიგის ამგვარი თავსმოხვევა ფუნდამენტური უფლებებისა და თურქეთის საერთაშორისო ვალდებულებების აშკარა დარღვევაა და ქვეყანას ბნელ გზაზე აყენებს“, – განაცხადა ამორმა X-ზე გამოქვეყნებულ პოსტში.
თურქეთის იუსტიციის მინისტრმა აქინ გურლეკმა განაცხადა, რომ სტამბოლის, ანკარის, იზმირის, აიდინისა და მერსინის პროკურატურების კოორდინირებული გამოძიების ფარგლებში სასამართლო პროცედურები 162 ეჭვმიტანილის, ცხრა ასოციაციისა და 13 ბიზნესის წინააღმდეგ მიმდინარეობს. საქმეები 15 პროვინციას მოიცავს.
