უკვე 2 ღამეა, მოსკოვის ვნუკოვოსა და შერემეტიევოს აეროპორტებში თვითმფრინავების მიღება-გამგზავრებაზე დროებითი შეზღუდვებია დაწესებული.
The Moscow Times-ის ცნობით, შეზღუდვები უკრაინის პრეზიდენტ ვოლოდიმირ ზელენსკის განცხადებებს მოჰყვა, რომელთა მიხედვითაც, რუსეთის საჰაერო სივრცე სამოქალაქო ავიაციისთვის სულ უფრო სახიფათო ხდება.
რუსეთის ფედერალურმა საჰაერო ტრანსპორტის სააგენტო „როსავიაციამ“ მოსკოვის აეროპორტებში დროებითი შეზღუდვების დაწესება დაადასტურა და მიზეზად ფრენის უსაფრთხოების უზრუნველყოფა დაასახელა.
Flightradar24-ის მონაცემებით, შერემეტიევოს აეროპორტში 21 რეისი გაუქმდა, 235 კი – დაგვიანდა. ვნუკოვოში 22 რეისი გაუქმდა და 94 დაგვიანდა.
1 სექტემბერს ვოლოდიმირ ზელენსკიმ ავიაკომპანიები და სადაზღვევო კომპანიები გააფრთხილა, რომ უკრაინული დრონების ინტენსიური გამოყენების გამო რუსეთის საჰაერო სივრცე სამოქალაქო ავიაციისთვის სახიფათო ხდება. უკრაინის პრეზიდენტმა თქვა, რომ კიევის სამიზნე არ არის სამოქალაქო ავიაცია, თუმცა რუსეთის ტერიტორიაზე დრონების ოპერაციების მასშტაბის ზრდა ფრენისთვის რისკს ქმნის.
რუსეთის ხელისუფლება ირწმუნება, რომ საჰაერო სივრცე უსაფრთხოა და ქვეყნის საავიაციო სისტემა ნორმალურად ფუნქციონირებს. რუსეთის ტრანსპორტის სამინისტრომ უცხოურ ავიაკომპანიებს უსაფრთხოების ზომებთან დაკავშირებით დამატებითი განმარტებებიც მიაწოდა.
ამავე პერიოდში რამდენიმე რეისი რუსეთის მიმართულებით გააუქმეს თურქულმა ავიაკომპანიებმა, მათ შორის Pegasus Airlines-მა. კომპანიამ მიზეზად „ტექნიკური და ოპერაციული“ გარემოებები დაასახელა.
