MMA-ის მებრძოლი გიორგი ქართველიშვილი, რომელიც ფეისბუკზე ხშირად აქვეყნებს „ქართული ოცნების” ლიდერებთან ერთად გადაღებულ ფოტოებს, „ეროვნული სიწმინდეების” დაცვის ინიციატივით გამოდის და ამბობს, რომ „იდენტობის დასაცავად საფრთხეს არ მოერიდებიან და მზად არიან, ციხეშიც კი წავიდნენ“.
ამ ინიციატივის შესახებ დასმულ შეკითხვაზე „ქართული ოცნების“ წევრი არჩილ გორდულაძე აცხადებს, რომ ყველას აქვს კანონის ჩარჩოში მოქცეული გაერთიანების შექმნის უფლება და „კარგია, როდესაც ადამიანებს აქვთ სურვილი, რომ დაიცვან, ხმა აიმაღლონ ქვეყნის კულტურის, ქვეყნის რწმენის, ადამიანების უფლებების, ისტორიის წინააღმდეგ მიმართულ მიზანმიმართულ ქმედებებზე.“
„საქართველოში უზრუნველყოფილია პირთა თავისუფალი გაერთიანება. ყველას აქვს უფლება, რომ გაერთიანდეს და საკუთარი აზრი დააფიქსიროს. ამავდროულად, ეს უნდა იყოს კანონის ჩარჩოებში სრულად მოხვედრილი.
რა თქმა უნდა, მნიშვნელოვანია და კარგია, როდესაც ადამიანებს აქვთ სურვილი, რომ დაიცვან, ხმა აიმაღლონ ქვეყნის კულტურის, ქვეყნის რწმენის, ადამიანების უფლებების, ისტორიის წინააღმდეგ მიმართულ მიზანმიმართულ ქმედებებზე.
რა თქმა უნდა, ეს ყველაფერი უნდა მოხდეს კანონის დაცვით და სრულ ჩარჩოებში“, – განაცხადა გორდულაძემ.
ჟურნალისტის შეკითხვაზე, საფრთხისშემცველად მიიჩნევს თუ არა ისეთი გაერთიანების შექმნას, რომლის წევრიც „ამართლებდა ონისე ოქრიაშვილზე თავდასხმას“, გორდულაძე აცხადებს, რომ ვერ ისაუბრებს ისეთ შესაძლო დანაშაულებრივ ქმედებაზე, რომელიც ადამიანს არ ჩაუდენია.
„საქართველოს კონსტიტუციაში წერია, რომ არც ერთი ადამიანი არ არის ვალდებული, ამტკიცოს თავისი უდანაშაულობა და სანამ არ დადასტურდება კანონიერ ძალაში შესული სასამართლო გადაწყვეტილებით, რომ ადამიანი არის დამნაშავე, არავის არ აქვს უფლება, მას უწოდოს დამნაშავე. ეს ვრცელდება როგორც სახელმწიფო-პოლიტიკური თანამდებობის პირზე, ასევე ჟურნალისტზე, რომელსაც აქვს პრეტენზია, რომ არის მიუკერძოებელი…
მე მოლოდინებზე ვერ ვისაუბრებ, მე ვარ ერთი იურისტი, მათ შორის, ვარ სახელმწიფო-პოლიტიკური თანამდებობის პირი და წარმოვადგენ „ქართულ ოცნებას“, რომლისთვისაც მნიშვნელოვანია ადამიანის უფლებები და ჩვენ ვერანაირად ვერ ვისაუბრებთ ადამიანის დანაშაულებრივ ქმედებაზე, რომელიც მას არ ჩაუდენია.
თუ რომელიმე ადამიანი ჩაიდენს დანაშაულს, დადგება შესაბამისი პასუხისმგებლობა. ამავდროულად, ყველას აქვს უფლება, გაერთიანდეს, მიუხედავად იმისა, ნაცჟურნალისტებს და ნაცმედიას მოეწონებათ თუ არ მოეწონება და კარგია, თუ ძალიან ბევრი ადამიანი ერთიანდება და ხმას იმაღლებს მიზანმიმართულ, დაორგანიზებულ შეტევაზე ქვეყნის კულტურასა და წარსულზე და ყველა იმ ღირებულებაზე, რომელიც საქართველოს საქართველოდ აქცევს, ქართველს ქართველად აქცევს, საქართველოს მოქალაქეს – საქართველოს მოქალაქედ. და სხვა ადამიანების შეურაცხყოფა, თავდასხმა პატრიარქზე, ეკლესიაზე, ამის გამართლება არც მორალურია და არც სამართლებრივი“, – განაცხადა გორდულაძემ.
გიორგი ქართველიშვილმა დღეს, 27 ივლისს „ეროვნული სიწმინდეების დაცვა“ დააანონსა და თქვა, რომ ამ მოტივით „საფრთხეს და ციხეში წასვლასაც არ მოერიდება“.
MMA მებრძოლი, რომელსაც Facebook-ზე „ქართული ოცნების” ლიდერებთან ერთად გადაღებული არაერთი ფოტო აქვს, ამბობს, რომ „იდენტობის, ტრადიციებისა და ღირებულებების წინააღმდეგ კამპანიის ავტორები, როგორც წესი, მსგავსი კამპანიების ავტორები – ფსევდოლიბერალური იდეოლოგიის მატარებლები, ქვეყნის გარედან დაფინანსებული ჯგუფები, პოლიტიკოსები, ე.წ. აქტივისტები, მედიის წარმომადგენლები თუ მათთან აფილირებული ადამიანები არიან“.
ქართველიშვილის თქმით, ამიტომ, „დღეიდან ის და მისი საინიციატივო ჯგუფი მათ წინააღმდეგ ბრძოლას დაიწყებს“.
გიორგი ქართველიშვილი MMA მებრძოლია. სამთავრობო პროპაგანდისტული მედია მას წარმოაჩენდა, როგორც კომიკოს და აქტივისტ ონისე ოქრიაშვილზე თავდამსხმელი პირის, ნიკა ხურცილავას მეგობარს.
ქართველიშვილის „მოძრაობაც“ ონისე ოქრიაშვილზე ძალადობის საქმეს დაეფუძნა.
22 ივლისს ონისე ოქრიაშვილს სახლთან რამდენიმე პირი დახვდა და თავს დაესხა. თავდამსხმელი ნიკოლოზ ხურცილავა დააკავვეს და 2 დღეში 5000-ლარიანი გირაოს საფუძველზე გაათავისუფლეს. ხურცილავას მხარს უჭერდა როგორც სამთავრობო პროპაგანდა, ისე უშუალოდ „ქართული ოცნების“ დეპუტატი და დიმიტრი სამხარაძეც, რომელმაც თქვა, რომ მზად იყო, დაკავებულს თავდებში ჩაჯდომოდა.
ქართველიშვილი დღეს ოქრიაშვილს და სხვა კომიკოსებსაც დაემუქრა.
როგორც თქვა, „ონისე ოქრიაშვილი ერთადერთი არ არის, ვინც შეურაცხმყოფელი ფორმით ხუმრობს“ და სხვებმა, „ვინც კონკრეტულ კადრებში სცენაზე მათთან ერთად სხედან და ხალისობენ, ქართველს ხალხს ბოდიში უნდა მოუხადონ“.
წინააღმდეგ შემთხვევაში, როგორც ქართველიშვილი ამბობს, „თუ კი ისინი საზოგადოების რეაქციას დაინახავენ, შემდეგ კი ვერ გაიაზრებენ, რომ წითელ ხაზებს ისევ კვეთენ, ქართველი ერის ღირსების შემლახავ თითოეულ კომენტარზე მოვითხოვთ პასუხს“.
