ყველა დონეზე მაქსიმუმს ვაკეთებთ, რათა ოკუპაცია დასრულდეს. ამის იქით ყველაფერი პოლიტიკური მატრაკვეცობაა – ასე გამოეხმაურა ევროინტეგრაციის კომიტეტის თავმჯდომარე ლევან მახაშვილი გახარიას პარტიის რეზოლუციის პროექტს, რომელიც 9 მაისს რუსეთის ფედერაციასა და ცხინვალის საოკუპაციო რეჟიმს შორის გაფორმებულ ე.წ. სამოკავშირეო ურთიერთქმედების გაღრმავების შესახებ ხელშეკრულებასა და ანექსიურ პოლიტიკაზე რეაგირებას შეეხება.
ლევან მახაშვილმა „პირველ არხს“ განუცხადა, რომ საქართველოს მკაფიო პოზიცია აქვს რუსულ ოკუპაციასთან დაკავშირებით პოლიტიკურ თუ საერთაშორისო სასამართლოების დონეზე.
13 მაისს რუსეთის დუმამ ე.წ. სამხრეთ ოსეთთან თანამშრომლობის გაღრმავების შესახებ შეთანხმების რატიფიცირება მოახდინა.
შეთანხმებას ვლადიმერ პუტინმა და ალან გაგლოევმა 9 მაისს მოაწერეს ხელი.
დოკუმენტს 15 მაისს გამოეხმაურა მაკა ბოჭორიშვილი, რომელმაც ევროსაბჭოს მინისტრთა 135-ე მინისტერიალის სესიაზე განაცხადა, რომ რუსეთი „კვლავ აგრძელებს საერთაშორისო ვალდებულებების უგულვებელყოფას და დგამს ნაბიჯებს საქართველოს რეგიონების ანექსიისკენ“.
